უკრაინის პრეზიდენტმა ვოლოდიმირ ზელენსკიმ განაცხადა, რომ ბელარუსის ლიდერს, ალექსანდრ ლუკაშენკას ერთი კვირა აქვს იმისთვის, რომ გაიყვანოს ტექნიკა, რომელიც, რუსული დრონების უკრაინის ქალაქებზე დარტყმების კორექტირებისთვის გამოიყენება, წინააღმდეგ შემთხვევაში კი ამას უკრაინა გააკეთებს.
ზელენსკის თქმით, როდესაც ლუკაშენკა ამბობს, რომ ომში ჩართვა არ სურს, ის საკუთარი მოსახლეობის წინაშე მაინც უნდა იყოს გულწრფელი, რადგან, ზელენსკის შეფასებით, საკითხი არ ეხება მხოლოდ მის პირად როლს, არამედ მთელი ქვეყნის შესაძლო ჩათრევას კონფლიქტში.
ზელენსკიმ აღნიშნა, რომ ომის დაწყების პირველივე დღეებიდან რუსეთის მხრიდან ბელარუსის ტერიტორიიდან ხდებოდა სარაკეტო დარტყმები უკრაინაზე.
მისი თქმით, არსებობს ინფორმაცია, რომ ბელარუსის ტერიტორიაზე, უკრაინის მოსაზღვრე რეგიონებში განთავსებულია ტექნიკა და გადამცემები, რომლებიც, უკრაინის შეფასებით, გავლენას ახდენს სამიზნეების კორექტირებაზე.
ზელენსკიმ ასევე განაცხადა, რომ რუსეთი გააგრძელებს ლუკაშენკაზე ზეწოლას, ბელარუსის ლიდერს კი უნდა ესმოდეს, რომ უკრაინა ამ სიტუაციას უპასუხოდ არ დატოვებს.
„ზედმეტი სიტყვები არ არის საჭირო. მის ანძებზე დღეს განთავსებულია გადამცემები - რუსული და ბელარუსული. რა მნიშვნელობა აქვს? მის ტერიტორიაზე, უკრაინის მოსაზღვრე ორი ოლქის გასწვრივ განთავსებულია ტექნიკა, რომელიც უკრაინის მოსახლეობის წინააღმდეგ ცეცხლის კორექტირებას ახორციელებს“, - განაცხადა ზელენსკიმ.
