Reuters-ის ინფორმაციით, აშშ-სა და ირანს შორის ურთიერთგაგების მემორანდუმის საბოლოო პროექტი, რომელიც შესაძლოა უახლოეს პერიოდში გაფორმდეს, მოიცავს როგორც თეირანის ბირთვულ პროგრამას, ისე ჰორმუზის სრუტის გახსნასა და ირანული ნავთობის მიმართ სანქციების შემსუბუქებას.
სააგენტოსთან საუბარში ირანის ერთ-ერთმა მაღალჩინოსანმა განაცხადა, რომ მემორანდუმის გაფორმების შემდეგ მხარეებმა 60 დღის განმავლობაში უნდა შეათანხმონ საბოლოო შეთანხმება, რომელიც ირანის ბირთვულ პროგრამას დაარეგულირებს.
პროექტის მიხედვით, ირანი დაუყოვნებლივ გახსნის ჰორმუზის სრუტეს ყველა კომერციული გემისთვის, ხოლო აშშ ირანის პორტების წინააღმდეგ მოქმედ საზღვაო ბლოკადას მოხსნის.
ამავე დროს, ვაშინგტონი ვალდებულებას იღებს, საბოლოო შეთანხმების მიღწევამდე ირანის წინააღმდეგ ახალი სანქციები არ დააწესოს.
დოკუმენტი ასევე ითვალისწინებს ირანული ნავთობის ექსპორტზე დაწესებული შეზღუდვების დროებით გაუქმებას, რაც თეირანს ნავთობის გაყიდვისა და შემოსავლების მიღების შესაძლებლობას მისცემს.
პროექტის თანახმად, აშშ ირანს 25 მილიარდი დოლარის ოდენობის გაყინულ აქტივებს დაუბრუნებს. თანხის გადარიცხვა შესაძლოა განხორციელდეს პირდაპირი ტრანსფერების, რეგიონული თანამშრომლობისა და ფინანსური საკრედიტო ხაზების მეშვეობით.
სანაცვლოდ, ირანი ვალდებულებას იღებს, არ აწარმოოს და არ შეიძინოს ბირთვული იარაღი, ასევე მოლაპარაკებების დასრულებამდე შეინარჩუნოს არსებული მდგომარეობა ბირთვულ სფეროში. კერძოდ, თეირანი შეწყვეტს ურანის გამდიდრების შემდგომ გაფართოებას და ახალი ბირთვული ობიექტების განვითარებას.
ამასთან, აშშ თანხმდება, რომ ირანმა შეამციროს მაღალგამდიდრებული ურანის მარაგები, ხოლო შესაბამისი მექანიზმი მხარეებმა მემორანდუმის გაფორმებიდან 60 დღის განმავლობაში უნდა შეიმუშაონ.
