ევროკომისიის პრეზიდენტი ურსულა ფონ დერ ლაიენი მიესალმება ევროკავშირის წევრი სახელმწიფოების გადაწყვეტილებას, რომლის მიხედვითაც 15 ივნისს ევროკავშირის 2026 წლის კვიპროსის თავმჯდომარეობის ფარგლებში, გაწევრიანების პირველი კონფერენციები გაიმართება უკრაინასა და მოლდოვასთან მოლაპარაკებების პირველი კლასტერის გასახსნელად.
„დღეს ევროკავშირმა მნიშვნელოვანი ნაბიჯი გადადგა წინ. ყველა წევრი სახელმწიფო შეთანხმდა უკრაინასა და მოლდოვასთან გაწევრიანების მოლაპარაკებების პირველი ბლოკის გახსნაზე“, - განაცხადა ფონ დერ ლაიენმა.
მისი თქმით, კონფერენციაზე ოფიციალურად გაიხსნება პირველი კლასტერი, რომელიც მოიცავს ევროკავშირის ძირითად ღირებულებებსა და პრინციპებს, მათ შორის კანონის უზენაესობას, დემოკრატიული ინსტიტუტების მდგრადობასა და ადამიანის უფლებების დაცვას.
„გაფართოება სტრატეგიული არჩევანია. ჩვენი ხალხების დაახლოებით ჩვენ ვაძლიერებთ მშვიდობას, უსაფრთხოებასა და კეთილდღეობას მთელ კონტინენტზე. მზარდი გაურკვევლობის პირობებში ევროკავშირის გაფართოება ჩვენს საერთო ინტერესებს ემსახურება“, - აღნიშნა ევროკომისიის პრეზიდენტმა.
ფონ დერ ლაიენის განცხადებით, ეს გადაწყვეტილება გამარჯვებაა არა მხოლოდ უკრაინისა და მოლდოვისთვის, არამედ მთლიანად ევროკავშირისთვისაც.
