ბრიუსელში გამართული შეხვედრა კარგი შესაძლებლობა იყო, რომ მხარეებს თავიანთი პოზიციები დაეფიქსირებინათ, არგუმენტები გაეცვალათ, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა.
„ბრიუსელში გუშინდელმა შეხვედრამ ისე ჩაიარა, როგორც პირველ ასეთ შეხვედრას უნდა ჩაევლო. კარგი შესაძლებლობა იყო, რომ მხარეებს თავიანთი პოზიციები დაეფიქსირებინათ, თავიანთი არგუმენტები გაეცვალათ. იმედია, ამ კარგი პირველი სამუშაო შეხვედრის შემდეგ პოლიტიკური დიალოგიც განახლდება, რათა იმ თემებზე ვისაუბროთ, რაც რეალურად ჩვენს მოსახლეობას აღელვებს.
ბრიუსელის მხრიდან დიდი თხოვნა იყო, რომ მედიაში ინფორმაცია არ ყოფილიყო გატანილი, მაგრამ შეხვედრა დასრულებული არ იყო და ბრიუსელმა გაჟონა, როგორც ამ პერიოდის განმავლობაში ჟონავდა. ეს არის სირცხვილი, თუნდაც ბრიუსელის მხრიდან, რომელიც შეხვედრაზე გეხვეწება, რომ ინფორმაცია გარეთ არ გაიტანო და შენ მეოთხე სართულიდან დაბლა არ ხარ ჩამოსული და მედიაში ინფორმაცია ჟონავს.
მეორე მხრივ, იმასაც ვხედავთ, რას წარმოადგენს „რადიო თავისუფლება“. პირდაპირ პროპაგანდის რუპორად იქცა ამ ძალების მიერ, რომლებიც ცდილობენ, ვიზალიბერალიზაციის საკითხი აქციონ შიდა დაპირისპირების თუ ხმაურის და საკუთარ ხელისუფლებასთან დაპირისპირების საგნად. რა თქმა უნდა, ამ თემით მანიპულირებას ცდილობენ. პოზიციები გაიცვალა და ვნახოთ, შემდგომი შეხვედრები აჩვენებს, რამდენად გულწრფელი და კონსტრუქციულია ბრიუსელი ურთიერთობაში, თუ ისევ პოლიტიკური არგუმენტები უნდა ისროლოს“, – განაცხადა მახაშვილმა.
