ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკომისიამ რუსეთის წინააღმდეგ სანქციების ახალი, 21-ე პაკეტი წარადგინა, რომელიც ენერგეტიკის, ფინანსური მომსახურების, კრიპტოვალუტების, ვაჭრობისა და თევზჭერის სექტორებზე იქნება ორიენტირებული.
მისი თქმით, ახალი პაკეტი მოიცავს ზომებს რუსეთის ენერგეტიკული სექტორის, ბანკების, სავაჭრო და მეთევზეობის კომპანიების წინააღმდეგ.
„დღეს წარმოგიდგენთ სანქციების 21-ე პაკეტს. ჩვენ ყურადღებას ვამახვილებთ იმ სფეროებზე, სადაც ზეწოლის ეფექტი ყველაზე მაღალია - ესენია ენერგეტიკა, ფინანსური მომსახურება და კრიპტოვალუტები, ვაჭრობა, ხოლო ამჯერად პირველად სიაში თევზჭერის სექტორიც შედის“, - განაცხადა ფონ დერ ლაიენმა.
ევროკომისიის პრეზიდენტის თქმით, ევროკავშირი ასევე გეგმავს ევროპაში შესვლის აკრძალვის დაწესებას რუსეთის ყოფილი სამხედრო მებრძოლებისთვის.
ენერგეტიკის მიმართულებით მთავარი მიზანია რუსეთის ნავთობის გაყიდვებიდან მიღებული შემოსავლების შემცირება. ამისთვის ევროკომისია ნავთობზე დაწესებული ფასის ზედა ზღვარი მოქმედი მექანიზმის კორექტირების დროებით შეჩერებას სთავაზობს.
ფონ დერ ლაიენის განმარტებით, მოქმედი მექანიზმი არ იყო გათვლილი ისეთ საბაზრო შოკებზე, როგორიც შეიძლება გამოიწვიოს ჰორმუზის სრუტის შესაძლო ჩაკეტვამ. ამიტომ ევროკომისია ფასის ზედა ზღვარი ავტომატური გადახედვის შეჩერებას მომავალი წლის იანვრამდე ითხოვს, რათა ნავთობის ბაზარმა სტაბილიზაცია შეძლოს და ამავე დროს რუსეთზე ზეწოლა შენარჩუნდეს.
ევროკავშირი ასევე აგრძელებს ზომების გამკაცრებას რუსეთის ე.წ. „ჩრდილოვანი ფლოტის“ წინააღმდეგ, რომელსაც მოსკოვი საერთაშორისო სანქციების გვერდის ავლით ნავთობის ექსპორტისთვის იყენებს.
სანქციების 21-ე პაკეტი ძალაში მხოლოდ მას შემდეგ შევა, რაც მას ევროკავშირის წევრი სახელმწიფოების მთავრობები ერთხმად დაამტკიცებენ.
