უკრაინის პრეზიდენტმა ვოლოდიმირ ზელენსკიმ Sky News-თან ინტერვიუში განაცხადა, რომ უკრაინა რუსეთის სიღრმეში დარტყმების გაძლიერებას გააგრძელებს და აგრესიის საპასუხოდ სულ უფრო მძლავრ ნაბიჯებს გადადგამს.
მისი თქმით, ბოლო დღეებში განხორციელებულმა ოპერაციებმა აჩვენა, რომ უკრაინულ უპილოტო აპარატებსა და სხვა შეიარაღებას რუსეთის მსხვილ ქალაქებამდე მიღწევა შეუძლიათ. მათ შორის იყო დარტყმები სანკტ-პეტერბურგზეც, სადაც ამ პერიოდში მნიშვნელოვანი ეკონომიკური ფორუმი იმართებოდა.
„ჩვენ უბრალოდ ჩუმად არ მოვკვდებით. ჩვენ ვუპასუხებთ. ყოველდღე უფრო ძლიერები გავხდებით“, - განაცხადა ზელენსკიმ.
მისი თქმით, უკრაინამ შეისწავლა, შექმნა და აწარმოა სხვადასხვა ტიპის რაკეტები და დრონები, რაც ქვეყნის თავდაცვით შესაძლებლობებს მნიშვნელოვნად აძლიერებს.
ზელენსკის შეფასებით, ვლადიმირ პუტინი მხოლოდ ძლიერი და ყოვლისმომცველი ზეწოლის პირობებში არის მზად მოუსმინოს როგორც უკრაინას, ისე მის საერთაშორისო პარტნიორებს.
უკრაინის პრეზიდენტმა ხაზგასმით აღნიშნა, რომ ქვეყნის პასუხი აღარ შემოიფარგლება მხოლოდ სასაზღვრო რაიონებით.
„უკრაინულმა დრონებმა უკვე აჩვენეს, რომ მათ შეუძლიათ მიაღწიონ რუსეთის დიდ ქალაქებსა და მნიშვნელოვან ურბანულ ცენტრებს. ჩვენ ამ ომს მათივე ტერიტორიაზე დავაბრუნებთ“, - განაცხადა ზელენსკიმ.
