ჩინეთის ტრანსპორტის სამინისტრომ ტაივანის კუნძულის აღმოსავლეთით მდებარე წყლებში სპეციალური საზღვაო ოპერაციის ჩატარების შესახებ განაცხადა.
მედიის ცნობით, ამის შესახებ ინფორმაციას ჩინეთის ტრანსპორტის სამინისტრო ავრცელებს.
„ოპერაციის მიზანია ჩინეთის მიერ ზღვაზე ადმინისტრაციულ-სამართლებრივი იურისდიქციის სრულყოფილად განხორციელება, შორეულ საზღვაო რაიონებში პატრულირებისა და სამართალდამცავი საქმიანობის გაძლიერება, საკვანძო აკვატორიებში ნაოსნობის კონტროლის გამკაცრება, საზღვაო მოძრაობის უსაფრთხოების უზრუნველყოფა და სახელმწიფო უფლებებისა და ინტერესების დაცვა,“ - აღნიშნულია განცხადებაში.
გავრცელებული ინფორმაციით, ოპერაცია ორგანიზებულია ჩინეთის სახალხო რესპუბლიკის ტრანსპორტის სამინისტროს მიერ გუანდუნისა და ფუძიანის პროვინციების საზღვაო უსაფრთხოების ადმინისტრაციებთან, ასევე აღმოსავლეთ ჩინეთის ზღვაში მოქმედ სანავიგაციო მხარდაჭერისა და სამაშველო სტრუქტურებთან თანამშრომლობით.
ტრანსპორტის სამინისტროში აცხადებენ, რომ ეს ქმედებები აუცილებელი პასუხია იაპონიისა და ფილიპინების მიერ ტაივანის კუნძულის აღმოსავლეთით მდებარე საზღვაო ზონების „გამიჯვნის“ საკითხზე მოლაპარაკებების დაწყების შესახებ ცალმხრივ განცხადებაზე.
ჩინეთის შეფასებით, აღნიშნული ნაბიჯი წარმოადგენს მისი ტერიტორიული სუვერენიტეტისა და საზღვაო უფლებებისა და ინტერესების სერიოზულ დარღვევას.
თავის მხრივ, ჩინეთის საგარეო საქმეთა სამინისტროს ოფიციალურმა წარმომადგენელმა, მაო ნინიმ განაცხადა, რომ იაპონიისა და ფილიპინების მსგავსი ქმედებები ეწინააღმდეგება გაერთიანებული ერების ორგანიზაციას საზღვაო სამართლის კონვენციას.
მისი თქმით, ჩინეთს ამ აკვატორიაში ექსკლუზიურ ეკონომიკურ ზონაზე კანონიერი უფლება აქვს, ამიტომ საზღვაო საზღვრების ნებისმიერი დელიმიტაცია (გამიჯვნა) მისი უშუალო მონაწილეობის გარეშე ვერ განხორციელდება.
ცნობისათვის, ფილიპინების პრეზიდენტმა, ფერდინანდ მარკოსმა განაცხადა, რომ ქვეყნის გეოგრაფიული მდებარეობიდან გამომდინარე, ფილიპინები გარდაუვლად აღმოჩნდება ჩართული ტაივანის გარშემო ნებისმიერი პოტენციური სამხედრო კონფლიქტის შემთხვევაში.
მისი თქმით, ფილიპინებისა და ტაივანს შორის სიახლოვის გამო, რეგიონში შესაძლო სამხედრო ესკალაცია პირდაპირ გავლენას მოახდენს ქვეყნის უსაფრთხოებასა და ეროვნულ ინტერესებზე. ამიტომ მან ხაზი გაუსვა, რომ ხელისუფლება ვალდებულია წინასწარ მოემზადოს მსგავსი სცენარებისთვის და დაიცვას ფილიპინელი მოქალაქეები.
მარკოსის ეს განცხადება ტაივანის სრუტეში მზარდი დაძაბულობის ფონზე გაკეთდა, სადაც ბოლო პერიოდში ჩინეთმა სამხედრო და საზღვაო აქტივობა მნიშვნელოვნად გააძლიერა.
