ირანმა აშშ-სთან მოლაპარაკებები შეაჩერა და ამის მიზეზად ისრაელის მიერ ლიბანში განხორციელებული სამხედრო მოქმედებები დაასახელა. ინფორმაციას ირანული სააგენტო Tasnim ავრცელებს.
სააგენტოს ცნობით, თეირანმა გადაწყვეტილება მას შემდეგ მიიღო, რაც, მისი შეფასებით, ისრაელმა დაარღვია ცეცხლის შეწყვეტასთან დაკავშირებული პირობები, რომლებიც ლიბანსაც მოიცავდა.
„ლიბანში ისრაელის რეჟიმის თავდასხმების გაგრძელების ფონზე, ირანის მოლაპარაკებების ჯგუფი შუამავლების მეშვეობით მიმდინარე მოლაპარაკებებსა და დოკუმენტების გაცვლას აჩერებს“, – ნათქვამია Tasnim-ის მიერ გავრცელებულ განცხადებაში.
ირანი მოითხოვს ღაზასა და ლიბანში სამხედრო მოქმედებების დაუყოვნებლივ შეწყვეტას, ასევე ლიბანის ტერიტორიიდან ისრაელის ძალების სრულ გაყვანას. სააგენტოს ინფორმაციით, ვიდრე აღნიშნული მოთხოვნები არ დაკმაყოფილდება, თეირანი ვაშინგტონთან მოლაპარაკებების განახლებას არ გეგმავს.
Tasnim ასევე წერს, რომ ირანმა და მისმა რეგიონულმა მოკავშირეებმა განიხილეს ჰორმუზის სრუტის შესაძლო ჩაკეტვის და სხვა მიმართულებებზე ზეწოლის გაძლიერების საკითხი, მათ შორის ბაბ ელ-მანდების სრუტეში, რომელიც წითელ ზღვასა და ადენის ყურეს აკავშირებს.
ამავე დროს, CNN იუწყება, რომ ისრაელის პრემიერ-მინისტრმა, ბენიამინ ნეთანიაჰუმ, სამხედროებს ბეირუთის სამხრეთ გარეუბან დაჰიეში, რომელიც „ჰეზბოლას“ მთავარ დასაყრდენად მიიჩნევა, დარტყმის განხორციელება უბრძანა. მედიის ცნობით, ისრაელის ერთ-ერთმა ოფიციალურმა პირმა განაცხადა, რომ აღნიშნული ოპერაციის გეგმები აშშ-სთან იყო კოორდინირებული.
CNN-ის ინფორმაციით, თეთრ სახლს ირანის გადაწყვეტილებასთან დაკავშირებით ოფიციალური კომენტარი ჯერჯერობით არ გაუკეთებია.
