აშშ-ის ომის მდივანმა პიტ ჰეგსეთმა განაცხადა, რომ შეერთებული შტატები მოძებნის გზებს, რათა გააგრძელოს უკრაინის მხარდაჭერა რუსეთის საფრთხეების წინააღმდეგ.
სინგაპურში, აზიის უსაფრთხოების სამიტის ფარგლებში, ჟურნალისტებმა მას ჰკითხეს უკრაინის პრეზიდენტის ვოლოდიმირ ზელენსკის წერილის შესახებ, სადაც საუბარი იყო საჰაერო თავდაცვის საშუალებების დეფიციტზე რუსეთის მხრიდან გაძლიერებული შეტევების ფონზე.
ჰეგსეთმა უპასუხა, რომ აშშ ცდილობს დაეხმაროს უკრაინას ყველგან, სადაც ეს შესაძლებელია:
„ჩვენ ვცვლით ყველა ამ მნიშვნელოვანი საბრძოლო მასალის წარმოების სისტემას, რათა უზრუნველვყოთ, რომ ჩვენი კომპანიები აწვდიან არა მხოლოდ ოდნავ მეტს, არამედ ბევრად მეტს მთელ სპექტრში. სადაც შეგვიძლია უკრაინას დავეხმაროთ - ვეხმარებით; სადაც შეგვიძლია ევროპას მივცეთ მეტი შესაძლებლობა - ამასაც ვაკეთებთ,“ - განაცხადა ჰეგსეთმა.
მისი თქმით, ევროპელი მოკავშირეები უკვე ზრდიან უკრაინის მხარდაჭერას, ხოლო აშშ პარალელურად აძლიერებს წარმოებასა და მიწოდების შესაძლებლობებს, რათა სამხედრო დახმარება უფრო მასშტაბურად განხორციელდეს.
„მე შთამაგონებს ევროპული ერთგულება ამ საქმის მიმართ. თუ დავაკვირდებით დახარჯულ თანხებს, ევროპამ გაააქტიურა თავისი ძალისხმევა, ხოლო უკრაინა ამ პროცესში არანაკლებ, ან კიდევ უფრო ეფექტურიც კი იყო.
ამიტომ ჩვენ გვინდა, რომ მათ შეეძლოთ საკუთარი თავის დაცვა და ჩვენ ვიპოვით გზას, რათა მათ დახმარება გავუწიოთ,“ - განაცხადა ჰეგსეთმა.
