ღამით რუსეთმა დრონით მიზანმიმართულად შეუტია თურქულ გემს, რომელიც ოდესის პორტიდან თურქეთის მიმართულებით მიემართებოდა. ამის შესახებ უკრაინული მედია უკრაინის შეიარაღებული ძალების სამხედრო-საზღვაო ძალებზე დაყრდნობით იუწყება.
როგორც ცნობილია, შეტევა განხორციელდა მშრალტვირთმზიდ ANT-ზე, რომელიც ვანუატუს დროშის ქვეშ დაცურავდა (გემის მფლობელი ქვეყანა - თურქეთი) და ოდესის ოლქის ერთ-ერთი პორტიდან თურქეთისკენ ბორტზე არსებული ტვირთით მიემართებოდა.
დრონის მოხვედრის შედეგად გემის ზედა კონსტრუქციაში ხანძარი გაჩნდა, თუმცა საზღვაო სამძებრო-სამაშველო სამსახურისა და უკრაინის სამხედრო-საზღვაო ძალების დანაყოფებმა მისი სწრაფად ლოკალიზება შეძლეს.
ამავე დროს, დარტყმის შედეგად ეკიპაჟის ორი წევრი დაშავდა. ისინი უკრაინის სამხედრო-საზღვაო ძალების კატერებით სამედიცინო დაწესებულებაში გადაიყვანეს.
