რუსეთის პრეზიდენტმა, ვლადიმირ პუტინმა ხელი მოაწერა კანონს, რომელიც საზღვარგარეთ დაკავებული რუსეთის მოქალაქეების დასაცავად შეიარაღებული ძალების გამოყენების უფლებას იძლევა.
მედიის ცნობით, დოკუმენტის მიხედვით, რომელიც 13 მაისს დაამტკიცა დუმამ, ხოლო 20 მაისს - ფედერაციის საბჭომ, პუტინს უკვე შეუძლია არმიის გამოყენება რუსეთის მოქალაქეების „დასაცავად“ იმ შემთხვევებში, თუ ისინი საზღვარგარეთ დააკავეს, ჰყავთ დაკავებული ან მათ მიმართ მიმდინარეობს სისხლის სამართლის ან სხვა სახის დევნა.
კანონი სხვა სახელმწიფოების ან საერთაშორისო სასამართლოების მიერ რუსეთის მოქალაქეების დაკავების, სისხლის სამართლებრივი ან სხვა დევნის შემთხვევაში რუსეთის შეიარაღებული ძალების გამოყენების უფლებას ითვალისწინებს.
კანონის თანახმად, საზღვარგარეთ რუსეთის მოქალაქეების დასაცავად შეიარაღებული ძალების გამოყენების ბრძანება ქვეყნის პრეზიდენტმა უნდა გასცეს.
რუსეთის პრეზიდენტს მანამდეც ჰქონდა უფლება გაეგზავნა ჯარი საზღვარგარეთ იმ შემთხვევაში, თუ სხვა ქვეყნების ან საერთაშორისო ორგანოების გადაწყვეტილებები რუსეთის ინტერესებს ეწინააღმდეგებოდა, თუმცა ახალი ცვლილება ამ შესაძლებლობებს აფართოებს.
