აშშ-ის პრეზიდენტმა, დონალდ ტრამპმა განაცხადა, რომ შაბათს მომლაპარაკებებელთა გუნდს შეხვდება, რათა ირანის ბოლო წინადადება განიხილოს და, სავარაუდოდ, კვირამდე გადაწყვიტოს, განაახლებს თუ არა ომის აქტიურ ფაზას.
Axios-თან საუბარში ტრამპმა თქვა, რომ „კარგი შეთანხმების“ მიღწევის ან ირანის „სრული განადგურების“ შანსები „ზუსტად 50/50-ზეა“.
გამოცემის ცნობით, მოგვიანებით აშშ-ის პრეზიდენტი სპარსეთის ყურის ქვეყნების ლიდერებთან სატელეფონო კონფერენციასაც გამართავს, რა დროსაც ირანის საკითხს განიხილავენ.
ტრამპის თქმით, ის ასევე სტივ უიტკოფსა და ჯარედ კუშნერს შეხვდება, რათა თეირანის ბოლო პასუხი განიხილონ. საუბარში, სავარაუდოდ, ვიცე-პრეზიდენტი ჯეი დი ვენსიც ჩაერთვება.
ამავე დროს, ირანის საგარეო საქმეთა სამინისტროს წარმომადგენელმა განაცხადა, რომ თეირანი და ვაშინგტონი ომის დასრულების შესახებ ურთიერთგაგების მემორანდუმის შეთანხმების ბოლო ეტაპზე იმყოფებიან.
ტრამპმა აღნიშნა, რომ მხოლოდ ისეთ შეთანხმებას დათანხმდება, რომელიც ურანის გამდიდრების საკითხსა და ირანის არსებული მარაგების ბედსაც მოიცავს.
„ვფიქრობ, ორი ვარიანტიდან ერთ-ერთი მოხდება - ან მათზე უფრო ძლიერ დარტყმას მივიტან, ვიდრე ოდესმე, ან ძალიან კარგ შეთანხმებას მოვაწერთ ხელს“, - განაცხადა ტრამპმა.
