აშშ-ის სახელმწიფო მდივანმა მარკო რუბიომ განაცხადა, რომ უკრაინასა და რუსეთს შორის აშშ-ის შუამავლობით მიმდინარე სამშვიდობო მოლაპარაკებები ამჟამად აღარ მიმდინარეობს.
მისი თქმით, ვაშინგტონი პროცესში იმიტომ ჩაერთო, რომ იყო ერთადერთი მხარე, რომელსაც კომუნიკაცია შეეძლო როგორც რუსეთთან, ისე უკრაინასთან.
„სამწუხაროდ, ამ მოლაპარაკებებმა შედეგი ვერ გამოიღო“, - აღნიშნა რუბიომ.
მან ასევე უარყო გავრცელებული ინფორმაცია, თითქოს აშშ უკრაინას კონკრეტული პოზიციის დაკავებას აიძულებდა. რუბიოს თქმით, ეს „ცრუ ინფორმაციის გაჟონვა“ იყო და რეალობას არ შეესაბამება.
„თუ დავინახავთ შესაძლებლობას, რომ გაიმართოს მოლაპარაკებები, რომლებიც პროდუქტიული იქნება და არა კონტრპროდუქტიული, და წარმატების რეალური შანსი ექნება, მზად ვართ ეს როლი შევასრულოთ“, - განაცხადა მარკო რუბიომ.
მისი თქმით, ამ ეტაპზე მსგავსი მოლაპარაკებები არ მიმდინარეობს, თუმცა იმედი გამოთქვა, რომ პროცესი შესაძლოა განახლდეს.
„ეს ომი მხოლოდ მოლაპარაკებების გზით შეიძლება დასრულდეს. ის არცერთი მხარის სამხედრო გამარჯვებით არ დასრულდება, ყოველ შემთხვევაში, სამხედრო გამარჯვების ტრადიციული გაგებით“, - აღნიშნა რუბიომ.
