აშშ-ის სახელმწიფო მდივანმა მარკო რუბიომ განაცხადა, რომ ირანთან ომის დასრულების შეთანხმების მიღწევის შანსები არსებობს, თუმცა, მისი თქმით, მოვლენების ზედმეტად ოპტიმისტურად შეფასება ჯერ ნაადრევია. რუბიომ განცხადებები ფლორიდაში, ჟურნალისტებთან საუბრისას გააკეთა, შვედეთში გამგზავრებამდე, სადაც NATO-ს საგარეო საქმეთა მინისტრების შეხვედრაში მიიღებს მონაწილეობას.
რუბიოს განცხადებით, მოლაპარაკებები გრძელდება და ხუთშაბათს ირანში პაკისტანის წარმომადგენლებიც გაემგზავრებიან, თუმცა ვაშინგტონი ურთიერთობს „სისტემასთან, რომელიც შიგნიდანაც არაერთგვაროვანია“.
მარკო რუბიოს განცხადებით, დიპლომატიური შეთანხმება არ შედგება, თუ ირანი ჰორმუზის სრუტეში გადასახადის დაწესებას შეეცდება.
„მსოფლიოში არავინ უჭერს მხარს ასეთ სისტემას. ეს არ შეიძლება მოხდეს, ეს მიუღებელია“, - განაცხადა რუბიომ.
მისი თქმით, თუ თეირანი ამ გზას გააგრძელებს, ეს დიპლომატიური შეთანხმების მიღწევას შეუძლებელს გახდის.
„თუ ისინი ამას ნამდვილად შეეცდებიან, ეს საფრთხე იქნება მთელი მსოფლიოსთვის და სრულიად უკანონოა“, - დასძინა აშშ-ის სახელმწიფო მდივანმა.
