უკრაინის ვიცე-პრემიერმა ტარას კაჩკამ სერბეთში ვიზიტის ფარგლებში, ხუთშაბათს, სერბეთის პრეზიდენტთან, ალექსანდარ ვუჩიჩთან გამართა შეხვედრა.
ამის შესახებ კაჩკამ X-ზე დაწერა.
მისი თქმით, მხარეებმა განიხილეს ევროკავშირის გაფართოების, ორმხრივი თანამშრომლობისა და რეგიონული განვითარების საკითხები.
„მოსაზრებები გავცვალეთ ევროკავშირის გაფართოების მომავალ პოლიტიკაზე და გაწევრიანების პროცესში დინამიკის შენარჩუნების მნიშვნელობაზე. ხაზგასმით აღვნიშნე, რომ წევრი სახელმწიფოების პოლიტიკური სიგნალები კანდიდატი ქვეყნებისთვის ძალიან მნიშვნელოვანია. ევროკავშირი მხარს უჭერს ინიციატივებს, რომლებიც ინტეგრაციის დაჩქარებას და გაწევრიანების პროცესის წინსვლას შეუწყობს ხელს“, - აღნიშნა კაჩკამ.
კაჩკამ აღნიშნა, რომ უკრაინის მთავარი პრიორიტეტი უცვლელი რჩება - ევროკავშირთან მოლაპარაკებების ყველა კლასტრის გახსნა და ევროკავშირში გაწევრიანების გზაზე შემდგომი პროგრესი.
მისივე თქმით, ალექსანდარ ვუჩიჩთან ასევე განიხილა ქვეყნებს შორის თავისუფალი ვაჭრობის შესახებ შეთანხმებაზე მოლაპარაკებების დასრულების მნიშვნელობა.
„მაღალ შეფასებას ვაძლევთ სერბეთის მზადყოფნას, კიდევ უფრო გააძლიეროს ორმხრივი დიალოგი“, - განაცხადა კაჩკამ.
ვიზიტის ფარგლებში უკრაინასა და სერბეთს შორის თავისუფალი ვაჭრობის შეთანხმებაზე მოლაპარაკებების განახლების შესახებ ერთობლივი განცხადება გაფორმდა.
ამასთან, მხარეებმა ხელი მოაწერეს ურთიერთგაგების მემორანდუმს ევროინტეგრაციის სფეროში თანამშრომლობის შესახებ.
უკრაინელი მაღალჩინოსნის ვიზიტს წინ უძღოდა სატელეფონო საუბარი უკრაინის პრეზიდენტს,ვოლოდიმირ ზელენსკისა და სერბეთის პრეზიდენტს შორის. მოლაპარაკებების შემდეგ ზელენსკიმ განაცხადა, რომ ორივე ლიდერი ორმხრივი ურთიერთობების განვითარების პოტენციალს ხედავს.
