აშშ-ის პრეზიდენტმა დონალდ ტრამპმა განაცხადა, რომ თუ ირანთან სამშვიდობო შეთანხმების მიღწევა ვერ მოხერხდება, აშშ-ს შესაძლოა უფრო ძლიერი სამხედრო დარტყმების გამოყენება დასჭირდეს.
ამის შესახებ მან ქალაქ ნიუ ლონდონში, შეერთებული შტატების სანაპირო დაცვის აკადემიის გამოსაშვებ ცერემონიაზე სიტყვით გამოსვლისას განაცხადა, წერს Reuters.
ამავდროულად, ტრამპმა არ გამორიცხა, რომ დარტყმების გამკაცრება შესაძლოა არც მოხდეს.
„ვნახოთ, რა მოხდება. ჩვენ მათ ძალიან ძლიერი დარტყმა მივაყენეთ. შესაძლოა კიდევ მოგვიწიოს დარტყმა, ან შეიძლება არა“, - თქვა მან.
მისი თქმით, აშშ-ის მთავარი მიზანია ირანის მიერ ბირთვული იარაღის განვითარების თავიდან აცილება.
ტრამპმა ასევე აღნიშნა, რომ ირანის სამხედრო პოტენციალი მნიშვნელოვნად „გაქრა“ და ახლა მთავარი კითხვა არის ის, მიაღწევენ თუ არა მხარეები შეთანხმებას.
„მათი ფლოტი აღარ არსებობს, მათი ავიაცია აღარ არსებობს - თითქმის ყველაფერი განადგურებულია. ერთადერთი კითხვა ისაა: მივალთ თუ არა ბოლომდე და მოაწერენ თუ არა ისინი ხელს შეთანხმებას. ვნახოთ, რა მოხდება“, - განაცხადა დონალდ ტრამპმა.
