უნგრეთის პრემიერ-მინისტრი პეტერ მადიარი სამშაბათიდან ოფიციალური ვიზიტით პოლონეთში იმყოფება. ოთხშაბათს იგი ვარშავაში დონალდ ტუსკს შეხვდა.
ერთობლივ პრესკონფერენციაზე დონალდ ტუსკმა განაცხადა, რომ პოლონელები მრავალი თვის განმავლობაში აკვირდებოდნენ უნგრეთში მიმდინარე მოვლენებს.
„შენი ისტორიული გამარჯვება უნგრეთში არ ნიშნავს მხოლოდ იმას, რომ უნგრეთი ევროპას უბრუნდება - მაღალ სტანდარტებს, პატიოსნებას და ნამდვილ დემოკრატიას. ეს ასევე არის იმედის ნიშანი მილიონობით ადამიანისთვის ევროპასა და მსოფლიოში, რომ დემოკრატია, სამართლის უზენაესობა, წესიერება და მორალი პოლიტიკაში არ არის დაკარგული ღირებულებები“, - განაცხადა დონალდ ტუსკმა პეტერ მადიარისადმი მიმართვისას.
დონალდ ტუსკმა ასევე განაცხადა, რომ უნგრეთის მთავრობის ხელმძღვანელს პოლონეთში ბევრი მეგობარი და, მისივე თქმით, „პოლიტიკური მხარდამჭერებიც“ ჰყავს.
„ჩვენ ვიცით, როგორ დავაფასოთ ბრძოლა. ეს ყოველთვის აერთიანებდა პოლონელებსა და უნგრელებს - იმის გააზრება, რომ მნიშვნელოვან საქმეებს სჭირდება სიმტკიცე და გულით ჩართულობა. გმადლობ, რომ ეს გული უნგრულ ფერებში მიიღე. მე კი ყოველთვის გულით ვატარებ პოლონეთის ფერებს, რადგან ძალიან კარგად ვიცით - ნებისმიერი ბოროტების დამარცხება შესაძლებელია, თუ არსებობს გული და რწმენა საკუთარ ხალხში“, - აღნიშნა დონალდ ტუსკმა.
დონალდ ტუსკმა განაცხადა, რომ პოლონეთი და უნგრეთი იმუშავებენ უკრაინის საკითხზე საერთო ევროპული პოზიციის ჩამოყალიბებაზე.
მისი თქმით, მას და უნგრეთის პრემიერ-მინისტრს ამ საკითხთან დაკავშირებით მსგავსი ხედვები აქვთ.
„უკრაინა ძალიან დაინტერესებულია გაწევრიანების მოლაპარაკებების დაჩქარებით. უკრაინა ძალიან მიისწრაფვის ევროკავშირის წევრობისკენ. პოლონეთი სრულად უჭერს მხარს ამ გეგმებს“, - განაცხადა დონალდ ტუსკმა.
პოლონეთის პრემიერ-მინისტრმა დონალდ ტუსკმა განაცხადა, რომ პეტერ მადიართან ერთად იმუშავებენ ევროკავშირში გაწევრიანების პროცესში მოქმედი ყველა წესის დაცვით - იმავე პრინციპებით, რომლებიც მოქმედებდა პოლონეთის წევრობამდე.
მისი თქმით, იგი ელის „კეთილგანწყობილ, მაგრამ საჭიროების შემთხვევაში კრიტიკულ“ თანამშრომლობას უნგრეთის მთავრობასთან და იმედოვნებს, რომ საერთო პოზიციის სწრაფად ჩამოყალიბება მოხერხდება.
ტუსკმა ასევე მადლობა გადაუხადა უნგრეთის მთავრობის ხელმძღვანელს ვიშეგრადის ჯგუფის (V4) აღდგენის მზადყოფნის შესახებ განცხადებისთვის და აღნიშნა, რომ ეს უფრო ფართო პროექტია.
მისი თქმით, ორივე ლიდერი თანხმდება, რომ ცენტრალური და აღმოსავლეთ ევროპა უნდა იქცეს რეგიონად, სადაც ევროპის მომავალი წყდება.
გარდა ამისა, ტუსკმა თქვა, რომ „წლების განმავლობაში ელოდა იმ მომენტს, როცა ისევ უნგრელ, სლოვაკ და ჩეხ ლიდერთან ერთად ერთ მაგიდასთან დაჯდებოდა და განიხილავდა, რა შეიძლება გაკეთდეს ჩვენი ხალხებისთვის“.
