2025 წლის ბოლოს ჩინეთში გადამზადება გაიარა დაახლოებით 200-მა რუსმა სამხედრო მოსამსახურემ, რომელთა ნაწილი შემდეგ უკრაინის წინააღმდეგ საბრძოლველად დაბრუნდა.
ამის შესახებ სააგენტო Reuters წყაროებზე და შესაბამის დოკუმენტებზე დაყრდნობით იუწყება.
„საიდუმლო სასწავლო კურსების შესახებ, რომლებიც ძირითადად დრონების გამოყენებას ეხებოდა, საუბარია რუსულ-ჩინურ ორმხრივ შეთანხმებაში, რომელიც პეკინში 2025 წლის 2 ივლისს მაღალი რანგის რუსმა და ჩინელმა ოფიცრებმა გააფორმეს.
შეთანხმება, რომელსაც Reuters გაეცნო, ითვალისწინებდა, რომ დაახლოებით 200 რუსი სამხედრო მოსამსახურე გაივლიდა მომზადებას სამხედრო ობიექტებზე, მათ შორის პეკინში და აღმოსავლეთ ქალაქ ნანჯინგში. წყაროების ინფორმაციით, დაახლოებით ამდენმა სამხედრო პირმა მართლაც გაიარა სწავლება ჩინეთში.
დოკუმენტში ასევე აღნიშნულია, რომ ასობით ჩინელი სამხედრო გაივლის სწავლებას რუსეთის სამხედრო ობიექტებზე,“ - წერს გამოცემა
რუსეთისა და ჩინეთის თავდაცვის სამინისტროებმა Reuters-ის შეკითხვებს არ უპასუხეს.
ჩინეთის საგარეო საქმეთა სამინისტროში განაცხადეს, რომ ქვეყანა „მკაცრად იცავს ობიექტურ და მიუკერძოებელ პოზიციას [უკრაინაში ომის მიმართ] და ძალისხმევას არ იშურებს სამშვიდობო მოლაპარაკებების ხელშეწყობისთვის“.
