კუბის პრეზიდენტმა მიგელ დიას-კანელმა განაცხადა, რომ აშშ-ის შესაძლო სამხედრო თავდასხმა ქვეყანაზე „სისხლიან ხოცვა-ჟლეტას და არაპროგნოზირებად შედეგებს“ გამოიწვევს. ამის შესახებ CNN იუწყება.
კუბის ლიდერის თქმით, კუნძული აშშ-ისთვის საფრთხეს არ წარმოადგენს და არც რომელიმე ქვეყნის წინააღმდეგ აგრესიული განზრახვები აქვს. ამასთან, მან ხაზგასმით აღნიშნა, რომ კუბას გარე აგრესიისგან თავდაცვის კანონიერი უფლება აქვს.
„კუბა არ წარმოადგენს არანაირ საფრთხეს და არც რომელიმე ქვეყნის წინააღმდეგ აგრესიული გეგმები ან განზრახვები გააჩნია. ეს ეხება ასევე აშშ-საც და არასდროს ჰქონია, რაც ამ სახელმწიფოს მთავრობამ ძალიან კარგად იცის“, - განაცხადა მან.
კუბის ლიდერმა განაცხადა, რომ კუბა „უკვე განიცდის შეერთებული შტატების მხრიდან მრავალმხრივ აგრესიას“ და ხაზგასმით აღნიშნა, რომ ეს „ვერანაირად ვერ იქნება გამოყენებული, არც ლოგიკურად და არც სამართლიანად, კეთილშობილი კუბელი ხალხის წინააღმდეგ ომის დასაწყებად“.
ქვეყნის საგარეო საქმეთა მინისტრმა ბრუნო როდრიგესმა დაამატა, რომ დონალდ ტრამპის ადმინისტრაცია „დღითი დღე აყალიბებს საფუძველს, რათა გაამართლოს კუბელი ხალხის წინააღმდეგ დაუნდობელი ეკონომიკური ომი და შესაძლო სამხედრო აგრესია“.
ამასთან, კუბის საგარეო საქმეთა მინისტრმა ბრუნო როდრიგესმა განაცხადა:
„ვინც კუბაზე უკანონო თავდასხმას ცდილობს, ნებისმიერ საბაბს იყენებს — როგორი ცრუ და აბსურდულიც არ უნდა იყოს ის — რათა გაამართლოს შეტევა, რომელიც ეწინააღმდეგება როგორც აშშ-ში, ისე მსოფლიოში საზოგადოებრივ აზრს“.
კუბაში შესაძლო შეჭრის საფრთხის ფონზე, სამოქალაქო თავდაცვამ მოსახლეობაში დაიწყო ომის შემთხვევაში მოქმედების ინსტრუქციების გავრცელება. მოქალაქეებს ურჩევენ მოამზადონ საგანგებო ზურგჩანთები ხანგრძლივი შენახვის პროდუქტებით და რეაგირება მოახდინონ საჰაერო განგაშის სირენებზე.
