უკრაინის შეიარაღებული ძალების გენერალური შტაბის განცხადებით, რუსეთის მოსკოვის ოლქში მდებარე სამიზნეებზე დარტყმებისას გამოყენებული იყო უკრაინული წარმოების დრონები RS-1 „ბარსი“, FP-1 „Firepoint“, BARS-SM „GLADIATOR“ და სხვა სისტემები.
უწყების ცნობით, აღნიშნულ ოპერაციაში მონაწილეობდნენ 412-ე ცალკეული უპილოტო სისტემების ბრიგადა, 107-ე რეაქტიული არტილერიის კრემენჩუგის ბრიგადა, მე-19 სარაკეტო ბრიგადა „წმინდა ბარბარა“, ასევე უპილოტო სისტემების პირველი ცალკეული ცენტრი და სხვა დანაყოფები.
გენშტაბის ინფორმაციით, დარტყმა მიაყენეს მოსკოვის ოლქის ზელენოგრადში მდებარე საწარმო „ანგსტრემს“, რომელიც მაღალი ტექნოლოგიების პროდუქციისა და ზუსტი იარაღისთვის განკუთვნილი მიკროსქემების წარმოებაზეა სპეციალიზებული. ობიექტზე ხანძარი დაფიქსირდა.
უწყების განმარტებით, აღნიშნული საწარმო წარმოადგენს რუსეთის სამხედრო-სამრეწველო კომპლექსის მნიშვნელოვან ნაწილს და ჩართულია სამხედრო დანიშნულების მიკროელექტრონიკის, რადიოელექტრონიკის, ოპტიკური სისტემებისა და რობოტოტექნიკის წარმოებაში.
უკრაინის შეიარაღებული ძალების ინფორმაციით, მოსკოვის ოლქში დარტყმა მიაყენეს „სოლნეჩნოგორსკის“ სატუმბ სადგურს, რომელიც მოსკოვის გარშემო არსებული ნავთობპროდუქტების რგოლური მილსადენის კრიტიკულ ინფრასტრუქტურას წარმოადგენს და გამოიყენება ბენზინისა და დიზელის დიდი მოცულობით გადატუმბვის, შენახვისა და გადაზიდვისთვის, მათ შორის რუსეთის არმიის საჭიროებებისთვისაც. ობიექტის ტერიტორიაზე გაჩნდა ხანძარი.
ამასთან, დარტყმა მიაყენეს მოწინააღმდეგის სამეთაურო პუნქტს დონეცკის ოლქის ბუნგეს რაიონში, ასევე უპილოტო აპარატების მართვის პუნქტებს ხარკოვის ოლქში, ხერსონისა და დონეცკის ოლქებში.
გარდა ამისა, უკრაინელმა სამხედროებმა იერიშები მიიტანეს მოწინააღმდეგის ცოცხალი ძალის კონცენტრაციის ადგილებზე დონეცკის ოლქში, ზაპოროჟიესში, რუსეთის კურსკის ოლქში, ასევე დონეცკის ოლქში.
