17 მაისს უკრაინის პრეზიდენტმა ვოლოდიმირ ზელენსკიმ უკრაინის უსაფრთხოების სამსახურსა და თავდაცვის ძალებს რუსეთის მოსკოვის რეგიონზე განხორციელებული დარტყმებისთვის მადლობა გადაუხადა.
ამის შესახებ ზელენსკიმ Facebook-ზე დაწერა.
„რუსეთის მხრიდან ომის გაჭიანურებასა და ჩვენს ქალაქებსა და დასახლებებზე განხორციელებულ დარტყმებზე ჩვენი პასუხი სრულიად სამართლიანია. ამჯერად უკრაინულმა შორი მოქმედების „სანქციებმა“ მოსკოვის რეგიონსაც მიაღწია, ჩვენ რუსებს მკაფიოდ ვეუბნებით: მათმა სახელმწიფომ ეს ომი უნდა დაასრულოს..
უკრაინელი დრონებისა და რაკეტების მწარმოებლები მუშაობას აგრძელებენ. მადლობელი ვარ უკრაინის უსაფრთხოების სამსახურისა და თავდაცვის ძალების, სიზუსტისთვის. უკრაინის სახელმწიფო საზღვრიდან მანძილი 500 კილომეტრზე მეტია“, - განაცხადა ზელენსკიმ.
უკრაინის პრეზიდენტმა ხაზგასმით აღნიშნა, რომ მოსკოვის რეგიონში რუსული საჰაერო თავდაცვის სისტემების კონცენტრაცია ყველაზე მაღალია, თუმცა, მისი თქმით, უკრაინელი სამხედროები ამ ბარიერის გადალახვას მაინც ახერხებენ.
შეგახსენებთ, რომ რუსეთის თავდაცვის სამინისტრომ განაცხადა, რომ უკრაინამ რუსეთის ტერიტორიაზე 586 უპილოტო საფრენი აპარატით შეტევა განახორციელა, რომელთაგან დაახლოებით 130 მოსკოვის მიმართულებით მიფრინავდა.
