დონალდ ტრამპის ადმინისტრაციის წარმომადგენლები არაბთა გაერთიანებულ საამიროებს ირანთან მიმდინარე ომში უფრო აქტიური ჩართვისკენ და სპარსეთის ყურეში მდებარე ირანის ერთ-ერთი კუნძულის დაკავებისკენ მოუწოდებენ. ამის შესახებ The Telegraph იუწყება.

გამოცემის ინფორმაციით, ტრამპის გარემოცვის წევრები მიიჩნევენ, რომ საამიროებმა უნდა დაიკავონ ლავანის კუნძული, რომელიც, გავრცელებული ცნობებით, აპრილის დასაწყისში არაბთა გაერთიანებული საამიროების მიერ განხორციელებული საიდუმლო სამხედრო დარტყმების სამიზნე გახდა.

„წადით და დაიკავეთ!“ - განუცხადა The Telegraph-ს ტრამპის ადმინისტრაციის ყოფილმა მაღალჩინოსანმა უსაფრთხოების სფეროში.

„ამ შემთხვევაში ადგილზე საამიროების სამხედროები იქნებიან და არა ამერიკელები,“ - თქვა მან.

ეს მოწოდებები ემთხვევა ცნობებს იმის შესახებ, რომ არაბთა გაერთიანებული საამიროები 11-კვირიან კონფლიქტში სულ უფრო აქტიურად ერთვება და ამავდროულად ისრაელთან კავშირებს აძლიერებს.

ანალიტიკოსების შეფასებით, ომი და ირანის მიერ ყურის ქვეყნების ინტენსიური დაბომბვა ახლო აღმოსავლეთში ძალთა მასშტაბურ გადანაწილებას აჩქარებს, სადაც რეგიონი მეტოქე ბანაკებად იყოფა.

გამოცემის ცნობით, ომის დაწყების შემდეგ საამიროები თეირანის თავდასხმის ერთ-ერთი მთავარი ობიექტი გახდა. სამეფოს მიმართულებით ირანმა 2 800-ზე მეტი რაკეტა და დრონი გაუშვა. შედეგად კი, არაბთა გაერთიანებულმა საამიროებმა გააძლიერა ურთიერთობები ამერიკასთან და ისრაელთან, ამავდროულად, მეზობელ ქვეყნებთან, მათ შორის საუდის არაბეთთან, ურთიერთობა დაეძაბა. მედიის ცნობით, საუდის არაბეთისა და არაბთა გაერთიანებული საამიროების დაახლოების ნაცვლად, ომმა კიდევ უფრო გააღრმავა მათ შორის განხეთქილება.