აშშ-ის პრეზიდენტს ჩინეთიდან დაბრუნების შემდეგ მნიშვნელოვანი გადაწყვეტილებების მიღება მოუწევს ირანთან დაკავშირებით, რადგან მისმა უახლოესმა გარემოცვამ მოამზადა სამხედრო დარტყმების განახლების გეგმები იმ შემთხვევისთვის, თუ დონალდ ტრამპი გადაწყვეტს ჩიხიდან გამოსვლას ახალი იერიშების გზით. ამის შესახებ The New York Times ინფორმირებულ წყაროებზე დაყრდნობით წერს.
გამოცემა აღნიშნავა, რომ თანაშემწეების თქმით, ტრამპს ჯერ არ მიუღია საბოლოო გადაწყვეტილება მომდევნო ნაბიჯებთან დაკავშირებით.
დაინტერესებული მხარეების წარმომადგენლები ცდილობენ მიაღწიონ კომპრომისს, რომელიც აიძულებს ირანს ხელახლა გახსნას ჰორმუზის სრუტე და საშუალებას მისცემს ტრამპს გამოაცხადოს გამარჯვება და დაარწმუნოს სკეპტიკურად განწყობილი ამერიკელი ამომრჩევლები, რომ ირანში ჩატარებული ძვირადღირებული სამხედრო ოპერაცი, რომელსაც მსხვერპლი მოჰყვა, წარმატებული იყო.
ტრამპმა პეკინიდან გამოფრენის შემდეგ, Air Force One-ის ბორტზე ჟურნალისტებთან კიდევ ერთხელ აღნიშნა, რომ ირანის მიერ წარდგენილი სამშვიდობო შეთანხმების ბოლო წინადადება მიუღებელია.
„მე გადავხედე მას და თუ პირველი წინადადება არ მომწონს, უბრალოდ უარვყოფ მას“, - თქვა დონალდ ტრამპმა.
ტრამპმა აღნიშნა, რომ ირანის საკითხი განიხილა ჩინეთის ლიდერთან, სი ძინპინთან, რომელიც თეირანის სტრატეგიული პარტნიორია და დამოკიდებულია ამ სრუტის გავლით ნავთობისა და გაზის მიწოდებაზე. თუმცა მან თქვა, რომ არ მოუთხოვია ბატონ სი ძინპინისთვის ირანზე ზეწოლის განხორციელება და მათი საუბრის სრული დეტალები ჯერ არ გასაჯაროებულა.
NYT წერს, რომ ტრამპი ომთან დაკავშირებით წინააღმდეგობრივ განწყობებს აწყდება. მიუხედავად იმისა, რომ ეს ომი მისთვის პოლიტიკურ ტვირთად იქცა და ის ხშირად თითქოს მზად იყო მისი დასრულებისთვის, აშშ-ის პრეზიდენტს ჯერ არ მიუღწევია იმ მთავარ მიზნამდე, რომელსაც თავად ომის საბოლოო ამოცანად წარმოადგენდა — ირანის ბირთვული იარაღის წარმოების შეჩერება.
გამოცემა წერს, რომ პენტაგონი ემზადება იმისთვის, რომ ოპერაცია „ეპიკური მრისხანება“, რომელიც შეჩერებული იყო მას შემდეგ, რაც ტრამპმა გასულ თვეში ცეცხლის შეწყვეტა გამოაცხადა, შესაძლოა უახლოეს დღეებში ახალი სახელით განახლდეს.
„ჩვენ გვაქვს მოქმედებების ესკალაციის გეგმა საჭიროების შემთხვევაში“, - განაცხადა აშშ-ის ომის მდივანმა პიტ ჰეგსეთმა კონგრესში კანონმდებლების წინაშე გამოსვლისას. მისი თქმით, ასევე განიხილება ოპერაციის დასრულება და ახლო აღმოსავლეთიდან 50 000-ზე მეტი სამხედრო მოსამსახურის დაბრუნება, მათი სტანდარტულ განლაგებაზე გადაყვანით.
ირანული მხარის ოფიციალური პირებიც აცხადებენ, რომ ემზადებიან საბრძოლო მოქმედებების განახლებისთვის.
გამოცემის თანახმად, ნებისმიერი ახალი იერიში ირანზე, სავარაუდოდ, გაგრძელდება იმ წერტილიდან, სადაც საბრძოლო მოქმედებები შეჩერდა 7 აპრილს, როცა ირანმა და აშშ-მა ცეცხლის შეწყვეტის შეთანხმებას მიაღწიეს.
