ისრაელი და ლიბანი ცეცხლის შეწყვეტის რეჟიმის კიდევ 45 დღით გახანგრძლივებაზე შეთანხმდნენ. ინფორმაციას აშშ-ის სახელმწიფო დეპარტამენტი ავრცელებს.
14–15 მაისს აშშ-ის სახელმწიფო დეპარტამენტში გაიმართა ორდღიანი მოლაპარაკებები ისრაელსა და ლიბანს შორის, რომელთა ორგანიზებასა და ხელშეწყობას ვაშინგტონი უზრუნველყოფდა. მხარეები შეთანხმდნენ მოლაპარაკებების ჩარჩოზე, რომელიც მიზნად ისახავს ორ ქვეყანას შორის გრძელვადიანი მშვიდობის მიღწევას, ერთმანეთის სუვერენიტეტისა და ტერიტორიული მთლიანობის სრულ აღიარებას, ასევე საერთო საზღვრის გასწვრივ რეალური უსაფრთხოების უზრუნველყოფას.
სახელმწიფო დეპარტამენტის ცნობით, მოლაპარაკებების განმავლობაში პოლიტიკური მიმართულებით მნიშვნელოვანი პროგრესი დაფიქსირდა. მხარეები შეთანხმდნენ, რომ პოლიტიკური დიალოგი გაგრძელდება და 2–3 ივნისს კვლავ განახლდება.
როგორც უწყების მიერ გავრცელებულ ინფორმაციაშია აღნიშნული, აშშ-ის შეფასებით, პროცესს სირთულეებს უქმნის ჰეზბოლას მიერ ისრაელზე განხორციელებული გაგრძელებული თავდასხმები, რომლებიც, ვაშინგტონის განცხადებით, ლიბანის მთავრობის თანხმობის გარეშე ხორციელდება და მიზნად ისახავს მოლაპარაკებების ჩაშლას. მიუხედავად ამისა, აშშ მიესალმება ორივე მთავრობის მზადყოფნას, მიუხედავად არსებული გამოწვევებისა, მიაღწიონ გრძელვადიან შეთანხმებას და აცხადებს, რომ გააგრძელებს ორივე მხარის მხარდაჭერას პროცესის წარმატებით წინსვლისთვის.
