უკრაინამ რუსეთს დიდი ხნის წინ გადასცა ტყვეების გაცვლისთვის სიები ფორმატში 1000 1000-ზე, რომლის შესახებაც აშშ-ის პრეზიდენტმა დონალდ ტრამპმა განაცხადა. თუმცა, მოსკოვი პროცესს აჭიანურებს და პასუხისმგებლობას უკრაინას აკისრებს. ამის შესახებ უკრაინის ომბუდსმენმა დმიტრო ლუბინეცმა განაცხადა.
მისი თქმით, ტყვეების გაცვლის პროცესი არ შეჩერებულა, თუმცა მოლაპარაკებები რთულად მიმდინარეობს.
„როდესაც რუსებთან რაღაცაზე თანხმდები, ვერასდროს იქნები 100%-ით დარწმუნებული, რომ ისინი შეთანხმებას შეასრულებენ. რეალურად, მუშაობა არ შეჩერებულა - ყოველდღიურად მიმდინარეობს როგორც ტექნიკური, ისე მოლაპარაკებების პროცესი“, - განაცხადა ლუბინეცმა.
მისი თქმით, უკრაინამ ყველა ვალდებულება უკვე შეასრულა - სიები გადაცემულია, მომლაპარაკებლების ჯგუფმა კი თავისი ნაწილი სრულად შეასრულა. ახლა გადაწყვეტილება რუსეთის მხარეზეა, თუმცა მოსკოვი პროცესს განზრახ აჭიანურებს და მანიპულირებას ცდილობს.
შეგახსენებთ, 8 მაისს აშშ-ის პრეზიდენტმა დონალდ ტრამპმა უკრაინასა და რუსეთს შორის სამდღიანი ცეცხლის შეწყვეტის შეთანხმება გამოაცხადა. მისი განმარტებით, დროებითი ზავი მოიცავდა თითოეული ქვეყნის მხრიდან 1 000 ტყვის გაცვლას. მოგვიანებით, რუსეთის პრეზიდენტმა ვლადიმირ პუტინმა განაცხადა, რომ კიევმა ტყვეების გაცვლის არცერთი წინადადება არ წარადგინა და „რადარებიდან გაქრა“. „ისინი საერთოდ გაქრნენ რადარებიდან და პირდაპირ განაცხადეს, რომ ამ გაცვლისთვის მზად არ არიან“, - აღნიშნა პუტინმა.
