აშშ-ის მთავრობის წარმომადგენელთა ოფიციალური განცხადებები, რომ ირანი სამხედრო თვალსაზრისით დამარცხებულია, ეწინააღმდეგება აშშ-ის დაზვერვის მონაცემებს. იტყობინება გამოცემა The New York Times-ი.
გამოცემის თანახმად, აშშ-ის დაზვერვის მონაცემების მიხედვით, ირანის ისლაუმური რესპუბლიკა კვლავ აკონტროლებს თავისი მობილური სარაკეტო დანადგარების დაახლოებით 70%-ს და შეინარჩუნა ომამდელი სარაკეტო არსენალის დაახლოებით 70%.
The New York Times-ის ცნობით, არსენალი მოიცავს როგორც ბალისტიკურ რაკეტებს, რომლებსაც რეგიონში სხვა ქვეყნების მიზანში ამოღება შეუძლიათ, ასევე რაკეტებს, რომლებიც სახმელეთო და საზღვაო სამიზნეების წინააღმდეგ გამოიყენება, შედარებით მოკლე დისტანციაზე.
ამასთან, დაზვერვის თანახმად, ირანმა აღადგინა ჰორმუზის სრუტეში განლაგებული 33 სარაკეტო სისტემიდან 30-ის ოპერატიული მზადყოფნა, რამაც შეიძლება საფრთხე შეუქმნას სრუტეში ტრანზიტით მყოფ ამერიკულ სამხედრო გემებსა და ნავთობტანკერებს.
სამხედრო დაზვერვა ასევე იუწყება, რომ რიგი წყაროების, მათ შორის თანამგზავრული ფოტოების საფუძველზე, ირანმა აღადგინა წვდომა ქვეყნის მასშტაბით არსებული მიწისქვეშა რაკეტების საცავებისა და გამშვები მოწყობილობების დაახლოებით 90 პროცენტზე. ამჟამად ისინი შეფასებულია, როგორც „ნაწილობრივ ან სრულად მოქმედი“.
გასულ კვირას გამოცემა „ვაშინგტონ პოსტმაც“ გაავრცელა მსგავსი ინფორმაცია, რომლის თანახმადაც, ირანმა აღადგინა მობილური გამშვები მოწყობილობების დაახლოებით 75 პროცენტი და ომამდელი სარაკეტო არსენალის დაახლოებით 70 პროცენტი.
დაზვერვის ეს მონაცემები ეწინააღმდეგება აშშ-ის პრეზიდენტ დონალდ ტრამპისა და ომის მდივნის პიტ ჰეგსეთის მტკიცებას, რომ ირანის სამხედრო შესაძლებლობები „განადგურებულია“ ან „აღარ წარმოადგენს საფრთხეს“.
"ახალი დაზვერვის მონაცემები მიუთითებს, რომ დონალდ ტრამპმა და მისმა სამხედრო მრჩევლებმა გადაჭარბებულად შეაფასეს ის ზიანი, რაც აშშ-ის სამხედრო ძალებმა შეიძლება მიაყენონ ირანის სარაკეტო ცენტრებს და არასაკმარისად შეაფასეს ირანის მდგრადობა და აღდგენის უნარი“, - ნათქვამია სტატიაში.
12 მაისს დონალდ ტრამპმა თავის პლატფორმაზე, Truth Social-ზე, გააკრიტიკა ირანთან ომის შესახებ მედია გაშუქება, კონკრეტული სტატიების დასახელების გარეშე. მან გამოცემებს, რომლებიც არ უჭერენ მხარს თეთრი სახლის პოზიციას, „პრაქტიკულად ღალატი“ უწოდა და განაცხადა, რომ ისინი მტერს უჭერენ მხარს.
