აშშ-ისა და უკრაინის მთავრობებმა ახალი თავდაცვითი შეთანხმების შესაძლო პირობების განსაზღვრის შესახებ მემორანდუმის პროექტი შეიმუშავეს. ამის შესახებ ამერიკული ტელეარხი CBS News სამ ინფორმირებულ წყაროზე დაყრდნობით იუწყება.
ტელეარხის ცნობით, დოკუმენტი შეთანხმებულია აშშ-ის სახელმწიფო დეპარტამენტსა და უკრაინის ელჩთან, ოლგა სტეფანიშინთან და თავდაცვითი შეთანხმებისკენ გადადგმულ პირველ ნაბიჯს წარმოადგენს.
შეთანხმებამ შესაძლოა უკრაინას მისცეს შესაძლებლობა, აშშ-ში სამხედრო ტექნოლოგიების ექსპორტი განახორციელოს და ამერიკულ კომპანიებთან ერთად ერთობლივ საწარმოებში დრონები აწარმოოს.
როგორც CBS News აღნიშნავს, ირანთან ომის ფონზე უკრაინამ საკუთარი სამხედროებისა და თავდაცვითი კონტრაქტორების მიერ რუსეთთან მრავალწლიანი ომის განმავლობაში შექმნილი ინოვაციები ეფექტიანად გამოიყენა. კიევმა ახლო აღმოსავლეთში გააგზავნა დრონ-გამანადგურებლები და ოპერატორები, რათა აშშ-ის მოკავშირეებს დახმარებოდა იმავე ირანული „შაჰედების“ მოგერიებაში, რომლებსაც რუსეთი უკრაინულ ქალაქებსა და სოფლებზე თავდასხმების დროს იყენებს.
უკრაინელმა ოფიციალურმა პირებმა თეთრ სახლს დრონების სფეროში თანამშრომლობის იდეა პირველად 2025 წლის აგვისტოში შესთავაზეს.
როგორც უკრაინელი მაღალჩინოსნები აღნიშნავენ, აშშ-სთან დრონების მიმართულებით თანამშრომლობა ორმხრივად მომგებიანი იქნება, რადგან ამერიკული დაფინანსება ორივე ქვეყანას თავდაცვითი პროდუქციის წარმოების გაფართოებაში დაეხმარება.
