ჩრდილოეთ გერმანიაში მეორე მსოფლიო ომის პერიოდის აქამდე უცნობი მასობრივი სამარხი აღმოაჩინეს, სადაც 42 ადამიანის ნეშტი იყო მოთავსებული. დაღუპულთა უმრავლესობა, სავარაუდოდ, მშვიდობიანი მოქალაქეები იყვნენ.
ამის შესახებ გამოცემა Spiegel წერს.
მასობრივი სამარხი კუნძულ უზედომზე,, გერმანიის ომის დროინდელი სამარხების კომისიის მკვლევრებმა აღმოაჩინეს . ეს არის ჰუმანიტარული ორგანიზაცია, რომელიც მუშაობს დაკარგული ადამიანების ბედის გარკვევაზე და უსახელო სამარხებში აღმოჩენილი ნეშტების იდენტიფიკაციაზე.
თავდაპირველად მიიჩნეოდა, რომ ადგილზე მხოლოდ ექვსი უცნობი ადამიანი იყო დაკრძალული, თუმცა გათხრების შედეგად დადგინდა, რომ იქ 42 ადამიანის მასობრივი სამარხი მდებარეობს.
დაღუპულთა შორის არიან ქალები და ბავშვები. ასაკი მერყეობს ჩვილებიდან დაახლოებით 70 წლამდე. ნეშტების მდგომარეობიდან ჩანს, რომ ბევრი მათგანი მძიმე ტრავმებით - მათ შორის თავის ქალის დაზიანებებითა და ამპუტაციებით - არის დაღუპული.
ორგანიზაციის ცნობით, გერმანიაში ყოველწლიურად პოულობენ 250–300 მსგავს უსახელო საფლავს, სადაც მეორე მსოფლიო ომის დროს დაღუპული გერმანელი და საბჭოთა სამხედროები, ასევე მშვიდობიანი მოქალაქეები და ლტოლვილები არიან დაკრძალული.
