რუსეთის პრეზიდენტმა ვლადიმირ პუტინმა განაცხადა, რომ მზად არის უკრაინის პრეზიდენტ ვოლოდიმირ ზელენსკის შეხვდეს არა მხოლოდ მოსკოვში, არამედ მესამე ქვეყანაშიც. ამის შესახებ მან მოსკოვში გამართული სამხედრო აღლუმის შემდეგ პრესკონფერენციაზე ისაუბრა.
პუტინის თქმით, ის ზელენსკისთან შეხვედრისთვის მზად არის, თუმცა მხოლოდ შეთანხმების ხელმოსაწერად. მან ასევე აღნიშნა, რომ აშშ „გულწრფელად ცდილობს კონფლიქტის დარეგულირებას“, თუმცა ეს, პირველ რიგში, უკრაინისა და რუსეთის საქმეა.
ამასთან, პუტინმა უკრაინა დაადანაშაულა იმაში, რომ კიევს, მისი თქმით, მოსკოვისთვის ტყვეების გაცვლის შესახებ არანაირი წინადადება არ გაუგზავნია.
„რუსეთმა ჯერ კიდევ ტრამპის წინადადებამდე გაუგზავნა უკრაინას სამხედრო ტყვეების გაცვლის შეთავაზება... კიევიდან ტყვეების გაცვლის შესახებ დღემდე არანაირი წინადადება არ შემოსულა“, - განაცხადა პუტინმა.
კრემლის ლიდერის თქმით, რუსეთმა უკრაინას გადასცა იმ უკრაინელი სამხედროების სია, რომლებიც ამჟამად ტყვეობაში იმყოფებიან.
„რუსეთმა უკრაინას 500 ტყვე უკრაინელი სამხედროს სია გადასცა, თუმცა ამის შემდეგ კიევი კონტაქტზე აღარ გამოსულა“, - თქვა პუტინმა.
ამასთან, ვლადიმირ პუტინის განცხადებით, მოსკოვში გამართულ აღლუმზე სამხედრო ტექნიკა არ გამოუყვანიათ, რადგან, როგორც მან აღნიშნა, წელს „დიდი სამამულო ომის“ დასრულების საიუბილეო თარიღი არ აღინიშნება.
ამასთან, მან დაამატა, რომ რუსულმა ჯარებმა ყურადღება ე.წ. „სპეციალურ სამხედრო ოპერაციაზე“ უნდა გაამახვილონ.
ვლადიმირ პუტინის განცხადებით, რუსეთ-უკრაინის ომი, დასასრულს უახლოვდება.
„ვფიქრობ, უკრაინულ კონფლიქტში საქმე დასასრულისკენ მიდის“, — განაცხადა რუსეთის პრეზიდენტმა.
ამასთან, პუტინმა უკრაინის წინააღმდეგ ომის დაწყების კიდევ ერთი „მიზეზიც“ დაასახელა.
„უკრაინაში მოვლენები მას შემდეგ დაიწყო, რაც კიევმა ევროკავშირთან ასოცირებისკენ ნაბიჯები გადადგა“, - განაცხადა პუტინმა.
