აშშ-ის პრეზიდენტმა დონალდ ტრამპმა არ გამორიცხა, რომ გერმანიაში განთავსებული ამერიკული ჯარების ნაწილი პოლონეთში გადაიყვანონ.
„პოლონეთს ეს მოეწონებოდა. ჩვენ პოლონეთთან შესანიშნავი ურთიერთობები გვაქვს. მე ძალიან კარგი ურთიერთობა მაქვს პოლონეთის პრეზიდენტ კაროლ ნავროცკისთან. მე მას მხარს ვუჭერ. ის ძალიან მომწონს. ამიტომ ეს შესაძლებელია“, - განაცხადა ტრამპმა ჟურნალისტების კითხვების საპასუხოდ.
2 მაისს ცნობილი გახდა, რომ აშშ-ის ომის მდივანმა პიტ ჰეგსეთმა გერმანიიდან დაახლოებით 5 000 ამერიკელი სამხედრო მოსამსახურის ერთი წლის განმავლობაში გაყვანის ბრძანება გასცა. მანამდე დონალდ ტრამპმა, გერმანიის კანცლერ ფრიდრიხ მერცთან უთანხმოების ფონზე, სოციალურ ქსელ Truth Social-ში დაწერა, რომ ვაშინგტონი გერმანიაში საკუთარი სამხედრო კონტინგენტის შემცირების შესაძლებლობას განიხილავს.
მერცმა გააკრიტიკა აშშ-ისა და ისრაელის მიერ 28 თებერვლიდან ირანის წინააღმდეგ წარმოებული ომი. ამ მიზეზით, თეთრმა სახლმა ასევე უარი თქვა გერმანიაში Tomahawk-ის ტიპის ფრთოსანი რაკეტებით აღჭურვილი ბატალიონის განთავსებაზე, რომელთა მოქმედების რადიუსი 2500 კილომეტრამდეა.
პენტაგონის მონაცემებით, 2025 წლის დეკემბერში ევროპაში მდებარე სამხედრო ბაზებზე მუდმივად დაახლოებით 68 ათასი ამერიკელი ჯარისკაცი და ოფიცერი იყო განთავსებული, მათგან დაახლოებით 36,4 ათასი გერმანიაში. მთლიანობაში, აშშ-ის შეიარაღებულ ძალებს გერმანიაში დაახლოებით 20 სამხედრო ობიექტი აქვს, ძირითადად ქვეყნის სამხრეთსა და სამხრეთ-დასავლეთში.
ის, რომ პოლონეთი მზად არის გერმანიიდან გამოყვანილი ამერიკული ჯარების ნაწილი პოლონეთის ტერიტორიაზე განათავსოს, კაროლ ნავროცკიმ მაისის დასაწყისში ლიეტუვაში ვიზიტის დროს განაცხადა.
„ჩვენ ამისთვის საჭირო ინფრასტრუქტურა გვაქვს“, — აღნიშნა მან.
თავის მხრივ, დამატებითი ამერიკული სამხედრო ძალების განთავსების მზადყოფნის შესახებ ლიეტუვის პრეზიდენტმა გიტანას ნაუსედამაც განაცხადა. ამჟამად ლიეტუვაში 1 000-ზე მეტი ამერიკელი სამხედრო მოსამსახურეა დისლოცირებული, ხოლო პოლონეთში - დაახლოებით 10 ათასი.
