აშშ-ის პრეზიდენტმა დონალდ ტრამპმა დაახლოებით 50 000 სამხედრო მოსამსახურე გაგზავნა ირანის წინააღმდეგ შესაძლო სამხედრო მოქმედებებში მონაწილეობის მისაღებად. ისინი განთავსებულები არიან ავიამზიდებზე, ესკადრონებზე, საზღვაო ქვეითთა ექსპედიციურ დანაყოფებში და საბრძოლო თვითმფრინავებზე. ისინი ჩართულნი არიან ტრამპის მიერ გამოცხადებულ მისიაში ირანის წინააღმდეგ, რომლის მიზნადაც დასახელებულია „ირანის რაკეტების განადგურება და მისი სარაკეტო ინდუსტრიის მიწასთან გასწორება“. ამჟამად ამერიკელი სამხედროები რეგიონში საბრძოლო მზადყოფნაში იმყოფებიან, მაშინ როცა თეთრი სახლი სამხედრო ოპერაციის სტატუსზე ურთიერთგამომრიცხავ სიგნალებს ავრცელებს. ამის შესახებ The New York Times წერს.

სახელმწიფო მდივანმა მარკო რუბიომ განაცხადა, რომ ოპერაცია „ეპიკური მრისხანება“ დასრულებულია. ომის მდივანმა პიტ ჰეგსეთმა კი განმარტა, რომ ძირითადი ძალისხმევა გადატანილია გემების დახმარებაზე, რათა მათ ჰორმუზის სრუტე უსაფრთხოდ გადალახონ, თუმცა ტრამპმა მოგვიანებით აღნიშნა, რომ ეს ნაბიჯიც შეჩერებულია.

შემდეგ ტრამპმა განაცხადა, რომ ის დაასრულებს ომს და უზრუნველყოფს გემების უსაფრთხო გადაადგილებას სრუტეში, თუ ირანი „დათანხმდება შეთანხმებულ პირობებს“, თუმცა დეტალები არ დააკონკრეტა. მან ასევე დაამატა, რომ „თუ ისინი არ დათანხმდებიან, დაბომბვები დაიწყება.“

მედია წერს, რომ აშშ-ის სამხედრო-საზღვაო ძალები კვლავ უზრუნველყოფს ირანის პორტებში და პორტებიდან საზღვაო გადაადგილების ბლოკადას, რომელიც დაწესდა მას შემდეგ, რაც ირანმა ფაქტობრივად ჰორმუზის სრუტე დახურა.

ამავე ცნობების მიხედვით, სამხედრო საზღვაო ავიაციამ ოთხშაბათს დაარტყა ირანის დროშის ქვეშ მცურავ ნავთობტანკერს, რომელიც ცდილობდა ბლოკადის გარღვევას.

ომის დაწყებამდე, თებერვალში, შუა აღმოსავლეთში მდებარე ბაზებსა და ხომალდებზე, მათ შორის საუდის არაბეთში, ბაჰრეინში, ერაყში, სირიაში, იორდანიაში, კატარში, არაბთა გაერთიანებული საამიროება და ქუვეითში ჩვეულებრივ განთავსებული იყო დაახლოებით 40 000 ამერიკელი სამხედრო.

თუმცა, როგორც მედია აღნიშნავს, ომის ესკალაციის ფონზე, მათი რაოდენობა 50 000-მდე გაიზარდა.