უკრაინის ეროვნული უსაფრთხოებისა და თავდაცვის საბჭოს მდივანი და უკრაინის მთავარი მომლაპარაკებელი რუსტემ უმეროვი მიმდინარე კვირაში მაიამიში გაემგზავრება, რათა აშშ-ის სპეციალურ წარმომადგენელს, სტივ უიტკოფს შეხვდეს. ამის შესახებ სწყაროებზე დაყრდნობით Bloomberg წერს.
გამოცემის ინფორმაციით, ბოლო კვირებში რუსეთსა და უკრაინას შორის სამშვიდობო მოლაპარაკებები ნაკლებ ყურადღებას იპყრობს, რადგან მსოფლიო ყურადღება აშშ-ს, ისრაელსა და ირანს შორის მიმდინარე კონფლიქტზეა გადატანილი.
ამასთან, რუსეთის პრეზიდენტი ვლადიმირ პუტინი არ აჩენს არანაირ ნიშნებს იმისა, რომ მზად არის უკრაინის დონეცკის ოლქის ნაწილზე ტერიტორიულ პრეტენზიებზე უარი თქვას.
ომის დასრულების შესახებ გამართული წინა მოლაპარაკებების მრავალმა რაუნდმა გარკვეული პროგრესის მიღწევის შესაძლებლობა შექმნა სხვადასხვა მიმართულებით, თუმცა დონბასის სტატუსი და ასევე იმის მკაფიო განსაზღვრა, თუ რა სახის უსაფრთხოების გარანტიებს მიიღებს უკრაინა მოკავშირეებისგან, კვლავ მთავარ დაბრკოლებად რჩება.
მოსკოვი ითხოვს, რომ უკრაინამ დონეცკის ოლქიდან საკუთარი ჯარები გაიყვანოს, ხოლო კიევი ამტკიცებს, რომ არ დათმობს მის კონტროლქვეშ არსებულ ტერიტორიებს და არ აღიარებს უკანონოდ ოკუპირებულ მიწებს.
Bloomberg-ის წყაროებმა შესაძლო შეხვედრის დღის წესრიგის დაზუსტებაზე უარი თქვეს.
„კიევს იმედი ჰქონდა, რომ უიტკოფი უკრაინაში სხვა სპეციალურ წარმომადგენელთან, ჯარედ კუშნერთან ერთად ჩავიდოდა, თუმცა ეს საკითხი ჯერ კიდევ გაურკვეველია. Bloomberg News-თან ინტერვიუში უკრაინის პრეზიდენტმა ვოლოდიმირ ზელენსკიმ განაცხადა, რომ ორივე მათგანი მიწვეულია, თუმცა ვიზიტი ჯერ არ დაუდასტურებიათ“, - აღნიშნულია სტატიაში.
