საქართველოს მეხუთე პრეზიდენტი სალომე ზურაბიშვილი აცხადებს, რომ ევროკავშირის ელჩს, ჯანდაცვის კომისარს და შეერთებული შტატების ელჩის მოვალეობის შემსრულებელს თხოვნით მიმართავს, დაეხმარონ დიუშენის კუნთოვანი დისტროფიით დაავადებულ ბავშვებს, რომელთა მშობლები რამდენიმე კვირაა მთავრობის ადმინისტრაციასთან ღამეებს ათევენ და შვილებისთვის წამალს ითხოვენ.
სალომე ზურაბიშვილის თქმით, მისი წერილი ევროკავშირის ელჩს და შეერთებული შტატების ელჩის მოვალეობის შემსრულებელს 9 მაისს გადაეცემათ.
"მინდა შევეხო დიუშენის კუნთოვანი დისტროფიით დაავადებული ბავშვების საკითხს, ეს არის ძალიან მტკივნეული საკითხი მთელი საზოგადოებისთვის და არამხოლოდ ჩემთვის პირადად, მგონი, ყველა დედასთვის გასაგებია თუ რას განიცდიან დღეს ის მშობლები, რომელბმაც იციან, რომ არსებობს რაღაც საშუალება, რომ თუნდაც დროებით გადავადდეს ამ ბავშვების დაავადება, მიეცეთ იმედი, სანამ სხვა მკურნალობა კიდევ არ გაჩნდება და ვერ პოულობენ ვერც პასუხს და ვერც დახმარებას ამ მიმართულებით აქაური რეჟიმისგან, რომელსაც, როგორც ჩანს, არაფერი ასეთი არ ადარდებს.
მე მგონი, რომ ეს არის ყველას, ჩვენი წუხილი და ყველამ უნდა ვიფიქროთ თუ რა შეიძლება გაკეთდეს. მე გადავწყვიტე მივმართო ევროკავშირის ელჩს და ევროკავშირის ჯანდაცვის კომისარს, რადგან მოვისმინე ძალიან დიდი ყურადღებით მათი განაცხადები ბოლო პერიოდში, რომ აქაურ მთავრობასთან, სანამ ეს მთავრობა არ შეცვლის თავის კურსს, არაფერი წინსვლა არ იქნება, ვერ იქნება, სამაგიეროდ მხარს უჭერს ევროკავშირი ჩვენ საზოგადოებას, რომელიც იბრძვის ჯერ კიდევ და რომელმაც გამოაჩინა თავისი პროევროპულობა არაერთხელ.
თუ ეს მხარდაჭერა რამეს ნიშნავს, იმ დროს, როცა შეწყდა პრაქტიკულად ყველა პროგრამა და ყველანაირი დაფინანსება საქართველოსთვის, ალბათ მოიძებნება საჭირო თანხები იმისთვის სწორედ, რომ დაეხმარონ ამ მშობლებს და მათთვის გამოიყოს ეს თანხები, რომელიც ესოდენ საჭირო. ამიტომ, მინდა მივმართო, მასზეგ არის 9 მაისი, ევროპის დღე და ევროპის დღეს ჩემი წარმომადგენლები მიიტანენ ევროკავშირის ელჩთან სწორედ ამ წერილს, რითაც მე მოვითხოვ, რომ ეს დახმარება გამოიყოს დიუშენის კუნთოვანი დისტროფიით დაავადებული ბავშვების მშობლებისთვის.
ძალიან დიდი იმედი მაქვს, რომ ეს არ დარჩება უპასუხოდ იმიტომ, რომ ეს არის საკითხი, რომელიც მართლა სიმბოლური იქნება მთელი საზოგადოებისთვის, რომ ევროკავშირი დღესაც, კიდევ არის ჩვენს გვერდით, რომელმაც ამდენი რამე გააკეთა საქართველოს ჯანდაცვისთვის აქამდე და ეს დახმარება გრძელდება.
ამავე დროს, იგივე წერილით მივმართავ ამერიკის ელჩის მოვალეობის შემსრულებელს, რომ გადაეცეს სახელმწიფო დეპარტამენტს იგივე თხოვნით, რომ ამერიკელებმაც, რომლებიც ასევე ძალიან ბევრი დაავადების წინაათმდეგ ბრძოლაში ჩვენს გვერდით იყვნენ და რეალურად ჩენ ვერ დავამარცხებდით იმ დაავადებებს რომ არა ამერიკის დახმარება, ამ მომენტში, ამ დროს გამოგვიწოდონ კიდევ დახმარების ხელი," - განაცხადა სალომე ზურაბიშვილმა.
