მარჯანიშვილის თეატრიდან მსახიობი ირაკლი ჩოლოყაშვილი გაათავისუფლეს. ინფორმაციას მსახიობი სოციალურ ქსელში ავრცელებს.
„მითხრეს, რომ აღარ ვჭირდები თეატრს... 30 წლის შემდეგ გამოაცხადეს, რომ აღარ ვჭირდები თეატრს... ბრძოლა იქნება უკომპრომისო...“- წერს მსახიობი.
ასევე მსახიობმა „ფორმულასთან“ განაცხადა, რომ ამ ეტაპზე თეატრიდან 9 მსახიობია გათავისუფლებული და საერთო ჯამში, თეატრიდან 28 მსახიობი უნდა გათავისუფლდეს.
„9 ადამიანია ამ ეტაპზე გათავისუფლებული და სამ თვეში კიდევ ბევრი უნდა შემცირდეს. როგორც ამბობენ, 28 მსახიობი უნდა გათავისუფლდეს 6 თვეში და სამი თვე უკვე გავიდა. ოფიციალურად არაფერი არ მიგვიღია [მიზეზი]. შეგვიძლია ვივარაუდოთ, რომ ნაკლებად ვართ დაკავებული რეპერტუარში, მაგრამ ეს ხომ ჩვენი ნებით არ ხდება? რეჟისორმა თუ არ გაგვანაწილა, ისე ვერ ვითამაშეთ, ჩვენ ვერ ვწყვეტთ. დასმა, 99%-მა ხელი მოაწერა, რომ არ ემხრობა ე.წ. რეორგანიზაციას, დავაფიქსირეთ წერილობით თეატრში და მერე მივაწვდით სამინისტროს“,- განაცხადა ირაკლი ჩოლოყაშვილმა „ფორმულასთან“.
ასევე, გაბრცელებული ინფორმაციით მარჯანიშვილის თეატრიდან გაათავისუფლეს მსახიობები ეკა ნიჟარაძე, ნინაკა გელაშვილი, გურამ ჯაში, ზაზა იაქაშვილი, ნათია გუბენკო და მაია კაციტაძე.
