18 აპრილს კიევში მომხდარი ტერაქტის დროს პოლიციელების ქმედებების გამო, უკრაინის საპატრულო პოლიციის დეპარტამენტის ხელმძღვანელმა, ევგენი ჟუკოვმა თანამდებობა დატოვა. ამის შესახებ ჟუკოვმა ბრიფინგზე განაცხადა.
„მე, როგორც სამხედრო ოფიცერმა გადავწყვიტე წარვადგინო განცხადება გადადგომის შესახებ. მე ვფიქრობ, ეს სამართლიანი იქნებოდა", - განაცხადა ჟუკოვმა პრესკონფერენციაზე.
მისი თქმით, ადგილზე გამოძახებული პოლიციელების ქმედება სამარცხვინო იყო.
„პოლიციელებმა არაპროფესიონალურად და პოლიციის ოფიცრებისთვის უღირსად იმოქმედეს. ისინი გამოძახებაზე მივიდნენ და მოქალაქეებს უნდა დახმარებოდნენ, უნდა გადაერჩინათ ისინი, თუმცა არასწორად შეაფასეს ვითარება და დაჭრილი მშვიდობიანი მოქალაქეები საფრთხეში დატოვეს“, – განაცხადა ჟუკოვმა.
ევგენი ჟუკოვმა აღნიშნა, რომ ცალკეული თანამშრომლების საქციელის მიხედვით მთლიანად პოლიციის შეფასება არასწორია.
ჟუკოვი საპატრულო პოლიციის დეპარტამენტის უფროსის თანამდებობას 2015 წლიდან იკავებდა.
