უნდა მივიჩნიოთ, რომ ბრძანება, რომელიც პატრიარქმა დაწერა და გამოაქვეყნა დაახლოებით 9 წლის წინ, ეს არის მისი ანდერძის სურვილი და ეს არის მისი ანდერძი, - ამის შესახებ დეკანოზმა ანდრია ჯაღმაიძემ ჟურნალისტებს განუცხადა.
მისი თქმით, სინოდის შეკრებაზე ჯერ არაფერი თქმულა, ვინაიდან, ჯერ სამგლოვიარო განწყობაა.
"ანდერძთან დაკავშირებით მე გეტყვით - პირველი კომენტარი მას შემდეგ, რაც 2017 წლის 23 ნოემბერს პატრიარქმა გამოაცხადა თავისი მოსაყდრე, პირველი კომენტარის გასაკეთებლად ტელევიზიაში როდესაც მივდიოდი, პატრიარქმა დამსვა და ამიხსნა, რა უნდა მელაპარაკა. რომ მესაუბრებოდა, ვერ ვუყურებდი, ისე მედო ფურცელი და ვიწერდი მის ნალაპარაკებს, ეს ფურცელი შენახული მაქვს დღესაც. მან თქვა ასეთი რამ - აი რომ არის მითქმა-მოთქმა, სად არის ანდერძი, რა წერია ანდერძში. მაშინ გახსოვთ, რომ ძალიან უხერხული თემები წამოვიდა, რომ თითქოს ქამარზე კიდია გასაღები და ა.შ. ეს სიტყვები მითხრა, ასე რომ ამბობენ, რომ ქამარზე კიდია გასაღებიო, თუ აქ არის თუ იქ არისო, ეხლაო, მაგით რომ არ დაინტერესდნენო, რაც უნდა ეწეროს მაგ ანდერძშიო, ის დავწერე და გამოვაცხადე ხმამაღლა, რომ აღარ ჰქონდეთ ამაზე ბჭობა, ეს წერია ანდერძში, თუ ის წერიაო... ამიტომ, უნდა მივიჩნიოთ, რომ ბრძანება, რომელიც პატრიარქმა დაწერა და გამოაქვეყნა დაახლოებით 9 წლის წინ, ეს არის მისი ანდერძის სურვილი და ეს არის მისი ანდერძი. [სინოდის შეკრებაზე] ჯერ არაფერი თქმულა, ჯერ სამგლოვიარო განწყობაა", - თქვა დეკანოზმა ანდრია ჯაღმაიძემ.
ცნობისათვის, 2017 წლის 23 ნოემბერს ქაშუეთის ეკლესიაში გიორგობისადმი მიძღვნილი საზეიმო წირვის დაწყების წინ ილია მეორემ საკუთარი ბრძანება წაიკითხა „მინდა, წაგიკითხოთ ბრძანება, რომელიც დღეს დაიწერა. სრულიად საქართველოს კათოლიკოს-პატრიარქის მოსაყდრედ დადგენილია მიტროპოლიტი მაღალყოვლადუსამღვდელოესობა, სენაკისა და ჩხოროწყუს მიტროპოლიტი შიო (მუჯირი)“, - განაცხადა მაშინ ილია მეორემ.
