რუსეთის უსასტიკეს კამპანიას - გაენადგურებინა ეკლესიები შინაარსობრივად და ფიზიკურად, ქართულმა ეკლესიამ დიდი წინააღმდეგობა გაუწია. პატრიარქმა ილია მეორემ ავტოკეფალიის აღიარების განმტკიცებით, ეს ისტორიული ხაზი დააგვირგვინა, - ამის შესახებ „დროას“ ლიდერის, ელენე ხოშტარიას მიერ ციხიდან გამოგზავნილ სამძიმრის წერილშია ნათქვამი, რომელიც სოციალურ ქსელში მის პირად გვერდზე გამოქვეყნდა.
„ვუსამძიმრებ ყველას საქართველოს კათალიკოს-პატრიარქის გარდაცვალებას.
ქართული ეკლესია, მისი ავტოკეფალიით, ქართული ენის შენარჩუნებით, ეროვნული თვითმყოფადობის გადარჩენისთვის ბრძოლით - რუსეთთან დაპირისპირების წინა ხაზზე იყო ყოველთვის. მსხვერპლიც ბევრი გაიღო, ბევრიც იბრძოლა.
რუსეთის უსასტიკეს კამპანიას - გაენადგურებინა ეკლესიები შინაარსობრივად და ფიზიკურად, ქართულმა ეკლესიამ დიდი წინააღმდეგობა გაუწია. პატრიარქმა ილია მეორემ ავტოკეფალიის აღიარების განმტკიცებით, ეს ისტორიული ხაზი დააგვირგვინა.
XXI საუკუნეში ეკლესიას თანამედროვე, თავისუფალ საზოგადოებაში ადგილი მოსაპოვებელი აქვს და ისტორიული ტრადიცია - გასახსენებელი და გასაგრძელებელი.
გულწრფელად ვისურვებდი, ძალიან რთულ მდგომარეობაში მყოფმა ეკლესიამ, ამ ისტორიულ გზაგასაყარზე ეს მოახერხოს. ეს იქნება პატრიარქის ღვაწლის დაფასებაც და, რაც მთავარია, ეროვნული ადგილის დაბრუნებაც.
მიხარია, რომ სიონში იქნება მისი საფლავი“, - ნათქვამია ელენე ხოშტარიას წერილში.
