კონგრესის ადმინისტრაციის თანამშრომლებს სხვადასხვა შეხვედრა აქვთ, მათ შორის პარლამენტშიც ექნებათ შეხვედრები, ყოველთვის მზად ვართ, რომ მათთვის საინტერესო საკითხებზე ვისაუბროთ, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისივე თქმით, კონგრესის ადმინისტრაციის თანამშრომლებისთვის საინტერესო იქნება, პირველწყაროდან მოისმინონ, თუ რა ხდება საქართველოში.
„საქართველოში ამერიკელი კონგრესმენები არ არიან ჩამოსული, ჩამოსული არიან კონგრესის ადმინისტრაციის თანამშრომლები, სხვადასხვა კონგრესმენების მრჩევლები. ეს არის ე.წ. სტაფერების ვიზიტი, აპარატის თანამშრომლებისა და მრჩევლების ვიზიტი. მათ სხვადასხვა შეხვედრა აქვთ, მათ შორის პარლამენტშიც ექნებათ შეხვედრები. ყოველთვის მზად ვართ, რომ მათთვის საინტერესო საკითხებზე ვისაუბროთ. გასაგებია, რომ ეს პოლიტიკური ხასიათის შეხვედრები ნაკლებად იქნება, ვინაიდან მრჩევლები არიან, შესაბამისად, ამბავს ჩაიტანენ შემდეგ უკვე თავის კონგრესმენებთან, რომლის მრჩევლებიც არიან - ალბათ, მათთვის საინტერესოა მოისმინონ პირველწყაროდან თუ რა ხდება სინამდვილეში საქართველოში და არ მოისმინონ ლორა თორთონებისგან და ეკა გიგაურებისგან, რომლებიც საქართველოს მიმართ მტრული რიტორიკით არიან გამორჩეულები“, - განაცხადა პაპუაშვილმა.
ცნობისთვის, აქართველოში აშშ-ის საელჩომ სოციალურ ქსელში გაავრცელა ინფორმაცია, რომ აშშ-ის კონგრესის თანამშრომელთა დელეგაცია საქართველოში შეხვედრებს გამართავს.
