საქართველოს მთავრობა სოფლის მეურნეობის პროდუქტების სასაწყობე მეურნეობებისა და ლოგისტიკური ცენტრების აშენებას გეგმავს.
მთავრობის აღნიშნული გადაწყვეტილების შესახებ პარლამენტში ყოველწლიური მოხსენებით გამოსვლისას საქართველოს პრეზიდენტმა მიხეილ სააკაშვილმა განაცხადა.
მისივე განმარტებით, აღნიშნული თვისობრივად შეცვლის ექსპორტის კულტურასა და გეოგაფიას, გააჩენს ახალ შესაძლებლობას ფერმერებისთვის და მათ აღარ მოუწევთ დამოუკიდებლად პროდუქციის გასაღების ბაზრების ძიება.
"საქართველოში არ არსებობს მაღალი დონის სასაწყობო მეურნეობები, რომლებიც ერთის მხრივ ჩაიბარებდა პროდუქციას და მეორე მხრივ, შეეცდებოდა მის რეალიზაციას. ლოგისტიკური ცენტები კი ფერმერებისგან მიღებულ პროდუქციას მისცემს მაღალ სასაქონლო სახეს ისე, რომ ის გახდეს კონკურენტუნარიანი ნებისმიერ ბაზარზე. თავად შეარჩევს ყველაზე მომგებიან ბაზრებს და გაამარტივებს პროდუქციის ტრანსპორტირებას, მოაგვარებს ყველა იმ პრობლემას, რომლის წინაშეც დამოუკიდებელი რესურსებით უძლურია ჩვეულებრივი ქართველი ფერმერი თუ გლეხი, მათ შორის გააჩენენ ფერმერსა და ექსპორტიორს შორის ინფორმაციის გაცვლის ეფექტურ მექანიზმს, რომლის შედეგადაც ფერმერს ეცოდინება, რომელ პროდუქტზეა გაზრდილი მოთხოვნა და მომგებიანი ფასი. ექნება საშუალება უფრო სწორად დაგეგმილი და მომგებიანი სოფლის მეურნეობა აწარმოოს", - განმარტა მიხეილ სააკაშვილმა.
ამასთან, ქვეყნის პირველი პირის თქმით, სახელმწიფო სოფლის მეურნეობის განვითარებაში უფრო აქტიურად ჩართვას ბიზნესთან პარტნიორობის პრინციპით აპირებს.
"რამდენიმე გამონაკლისის გარდა, კომპანიებმა განვითარების ნელი ტემპი შემოგვთავაზეს. მცირე დოზით ხდება თანამედროვე სოფლის მეურნეობის ადაპტაცია ჩვენს ცხოვრებში, მაგრამ ჩვენ სოფელს ვერ მივატოვებთ და არ მივატოვებთ. სურსათის მსოფლიო ფასების შესამცირებლად კი, სასიცოცხლოდ მნიშვნელოვანია ადგილობრივი წარმოების გაგრძელება", - დასძინა სააკაშვილმა.
