ამ პერიოდის განმავლობაში, რაც აქციები მიმდინარეობს, ჩვენს კლინიკაში არცერთი პაციენტი ოფიციალურად არ შემოსულა და იმ კლინიკებშიც არ არსებობს არცერთი ტოქსიკოლოგის ჩანაწერი, რომელიც დაადასტურებდა, რომ იყო მოწამვლასთან ასოცირებული პრობლემა, – ამის შესახებ ტოქსიკოლოგმა, პირველი საუნივერსიტეტო კლინიკის ტოქსიკოლოგიური მიმართულების ხელმძღვანელმა, ეკა ქურდაძემ განაცხადა.
ქურდაძე გამოეხმაურა „ბიბისის“ გავრცელებულ მასალას.
„მოგეხსენებათ, დარგის სპეციალისტმა უნდა შეაფასოს კონკრეტული პაციენტი, კონკრეტულ ადგილზე, თავისი ჩივილების გათვალისწინებით. რაიმე სპეციფიური ან არასპეციფიური ლაბორატორიული კვლევები თუ არსებობს, ამის საფუძველზე უნდა შედგეს დასკვნა. ზოგადად, რა ნივთიერებას რა შეუძლია, რისი გამოწვევა, შეიძლება, ბევრ თემაზე ვისაუბროთ, მაგრამ კონკრეტულად რა ნივთიერებასთან გვქონდა საქმე, მარტივი სადიაგნოსტიკო არ არის. შესაბამისად, ამ კუთხით არანაირი ინფორმაცია არ მაქვს, იქიდან გამომდინარე, რომ არცერთი პაციენტი კონკრეტულად არ მინახავს არც მე და ხმამაღლა შემიძლია ვთქვა, რომ არცერთ ჩვენგანს, ტოქსიკოლოგს. მსგავსი დიაგნოზი არცერთ შემთხვევაზე არ ყოფილა“, – განაცხადა ეკა ქურდაძემ.
