ტაილანდის მონარქის, მაჰა ვაჩირალონგკორნის (რამა X) დედა, დედოფალი სირიკიტი 93 წლის ასაკში გარდაიცვალა.
სამეფო ოჯახის ბიურომ ამის შესახებ შაბათს, 25 ოქტომბერს განაცხადა.
დედოფალი 66 წლის განმავლობაში იყო დაქორწინებული ყოფილ მონარქ ბჰუმიბოლ ადულიადეჯზე.
1960-იან წლებში დასავლურ მედიაში სირიკიტს ელეგანტურობის გამო აშშ-ის პირველ ლედის, ჟაკლინ კენედის ადარებდნენ.
AFP-ის ცნობით, ტაილანდში მას „ერის დედას“ უწოდებდნენ.
სამეფო პირი 24 ოქტომბრის საღამოს საავადმყოფოში გარდაიცვალა.
Reuters-ის ცნობით, სირიკიტი საჯაროდ 2012 წლიდან არ გამოჩენილა, როდესაც ინსულტი გადაიტანა.
2019 წელს ის სხვადასხვა დაავადების გამო საავადმყოფოში მოათავსეს და ექიმების მეთვალყურეობის ქვეშ იმყოფებოდა; 17 ოქტომბერს მას სისხლის ინფექცია განუვითარდა.
მეფე ვაჩირალონგკორნმა სამეფო ოჯახის წევრებსა და მთავრობის წარმომადგენლებს დაავალა, რომ ერთი წლის განმავლობაში იგლოვონ. სამთავრობო დაწესებულებებში დროშები 30 დღის განმავლობაში ნახევრად დაშვებული იქნება.
ტაილანდის პრემიერ-მინისტრმა ანუთინ ჩანვირაკუნმა გააუქმა კუალა-ლუმპურში 26-28 ოქტომბერს დაგეგმილ სამხრეთ-აღმოსავლეთ აზიის ქვეყნების ასოციაციის (ASEAN) სამიტზე ვიზიტი.
დედოფლის ცხედარს ბანგკოკის დიდ სასახლეში საპატიო პატივით დაასვენებენ.
სირიკიტის მეუღლე ყველაზე დიდხანს იყო ტაილანდის მონარქი. ის ტახტზე1950 წელს ავიდა.
დედოფალი პოპულარული იყო თანამემამულეთა შორის, რადგან აქტიურად იყო ჩართული საქველმოქმედო საქმიანობაში. საზღვარგარეთ ვიზიტების დროს ის მსოფლიოს თავისი სილამაზითა და სტილით ხიბლავდა.
