სსიპ სოფლის მეურნეობის სამეცნიერო-კვლევითი ცენტრის ჯიღაურას ბაზაზე აჭარის ავტონომიური რესპუბლიკის სოფლის მეურნეობის მინისტრს, დენის სალუქვაძეს ცენტრის დირექტორმა, ლევან უჯმაჯურიძემ უმასპინძლა. ინფორმაციას საქართველოს გარემოს დაცვისა და სოფლის მეურნეობის სამინისტრო ავრცელებს.
უწყების ინფორმაციით, შეხვედრაზე ყურადღება გამახვილდა საქართველოში ვაზისა და ხეხილის სერტიფიცირებულ ნერგების წარმოების არსებულ სისტემასა და მიმდინარე სამუშაოებზე. მინისტრს დეტალურად გააცნეს სერტიფიცირებული ნერგების წარმოების პროცესი: საძირეთა და სანამყენეთა სადედე მასალის შერჩევა, ეკრანულ სათბურებში (სკრინჰაუსებში) გამრავლება და საბაზისო ნერგების წარმოება. აღინიშნა, რომ ეს პროცესი უზრუნველყოფს კვალიფიციური სანერგეებისთვის საბაზისო ნერგების გადაცემას, რაც ქართული მევენახეობისა და მეხილეობის განვითარების მთავარ საფუძველს წარმოადგენს.
"მხარეებმა ერთობლივი პროექტების განხორციელების შესაძლებლობები განიხილეს. განსაკუთრებული ყურადღება გამახვილდა აჭარის რეგიონში სერტიფიცირებული ნერგების წარმოების ხელშეწყობაზე, ფერმერთა გადამზადებასა და ტრენინგების ჩატარების გეგმებზე.
შეხვედრას სოფლის მეურნეობის სამეცნიერო-კვლევითი ცენტრის დირექტორის მოადგილე ნოდარ ხატიაშვილი და ცენტრის შესაბამისი სამსახურების წარმომადგენლები ესწრებოდნენ.
ჯიღაურას ბაზაზე დენის სალუქვაძემ ვაზის ქართული და უცხოური ჯიშების კოლექციები, საძირეთა და სანამყენეთა სადედეები, ეკრანული სათბურები და ვაზისა და ღვინის სამუზეუმო სივრცე დაათვალიერა, გაეცნო ცენტრის საქმიანობის კვლევით მიმართულებებს და ინოვაციურ ტექნოლოგიებს, რომლებიც ნერგის წარმოების ხარისხის ამაღლებას ემსახურება", - ნათქვამია გავრცელებულ ინფორმაციაში.
