10 ოქტომბერს 20:00 საათზე რუსთაველის გამზირზე ექიმების აქცია გაიმართება. ინფორმაციას სოციალურ ქსელში მედიკოსი ლევან ფერაძე ავრცელებს.
დღეს დაანონსებულ აქციას ეხმაურება ექიმი გიორგი ახობაძე. ის მიმართავს კოლეგებს შემოიცვან თეთრი ხალათები და აჩვენონ, თუ რა შეუძლიათ.
„ციხეში როდესაც ვიყავი, ყველაზე მეტად რისი დანახვაც მინდოდა, ბევრი თეთრხალათიანი ექიმის დანახვა იყო ქუჩაში. ზუსტად ვიცოდი, რომ არ მოხდებოდა ეგ. მინდა რომ ვცდებოდე, ვცადოთ და გავაკეთოთ! ვნახოთ რისი თავი გვაქვს!
10 ოქტომბერს, 20:00 საათზე, ყველამ შემოიცვით თეთრი ხალათები და ვანახოთ რა შეგვიძლია“, - წერს გიორგი ახობაძე.
შეგახსენებთ, რომ გუშინ აკადემიკოსი გიორგი ჩახუნაშვილი დააკავეს. ის სამართალდამცველებმა თავისი სახლიდან გამოიყვანეს.
