ევროკავშირი რუსეთის წინააღმდეგ სანქციებისადმი მიდგომას ცვლის - თანდათანობითი შეზღუდვების ნაცვლად, უფრო რადიკალური ზომები მზადდება.

ამის შესახებ ევროკომისიის პრეზიდენტმა ურსულა ფონ დერ ლაიენმა კოპენჰაგენში ევროკავშირის ლიდერების არაფორმალური სამიტის შემდეგ განაცხადა.

„დადგა დრო, კიდევ უფრო გავზარდოთ ზეწოლა რუსეთზე. ჩვენ აღარ ვთავაზობთ ეტაპობრივ სანქციებს, არამედ მნიშვნელოვნად მკაცრ ზომებს - ენერგეტიკის, ფინანსური მომსახურებისა და ვაჭრობის სფეროში.

და ეს ყველაფერი უკვე შედის სანქციების მე-19 პაკეტში, რომელიც ამჟამად განხილვის პროცესშია“, - აღნიშნა მან.

ფონ დერ ლაიენის თქმით, პაკეტი შემუშავდა შეერთებულ შტატებთან კოორდინაციით და მისი მიღება უახლოეს მომავალში იგეგმება. პაკეტის ძირითადი პუნქტებია:

რუსული ნავთობის ფასის ზღვრული ნიშნულის შემცირება ბარელზე 47.6 დოლარამდე;

Mir-ის გადახდის სისტემის ფუნქციონირების შეზღუდვა;

რიგი მადნების, ლითონების, ქიმიკატებისა და მარილების ექსპორტის აკრძალვა;

 სანქციები რუსეთის ფედერაციის სამხედრო სექტორთან თანამშრომლობით დაკავებული 45 რუსული და უცხოური კომპანიის წინააღმდეგ.

გარდა ამისა, ევროკავშირი გეგმავს რუსული თხევადი ბუნებრივი აირის სრულად ამოღებას 2027 წლისთვის და მეორადი სანქციების დაწესებას მესამე ქვეყნების წინააღმდეგ, რომლებიც კრემლს სანქციების გვერდის ავლაში ეხმარებიან.