თბილისში მიმდინარე უწყვეტი აქციების დაწყებიდან 300 დღის გასვლის აღსანიშნად, 23 სექტემბერს, 300 არაგველის ძეგლიდან პარლამენტისკენ მსვლელობა გაიმართებ.ა ამის შესახებ ერთობლივი განცხადება პარლამენტთან სხვადასხვა სფეროს წარმომადგენლებმა და სამოქალაქო ჯგუფებმა გააკეთეს.
"ვიდგებით ქუჩაში მანამ, სანამ ქვეყანა არ დაუბრუნდება დემოკრატიულ განვითარების გზას, სანამ ყველა პოლიტპატიმარი არ განთავისუფლდება და არ ჩაინიშნება ახალი სამართლიანი საპარლამენტო არჩევნები"- ნათქვამია ერთობლივ განცხადებაში.
„300 დღეა, რაც [მმართველი პარტია] საქართველოს კონსტიტუციასა და კანონს არღვევს, საქართველოს სუვერენიტეტს საფრთხეს უქმნის და ქვეყანას ცივილურ სამყაროსგან სრულ იზოლაციაში აგდებს. 300 დღეა, რაც ებრძვის ქვეყნის დასავლურ პარტნიორებს, სამოქალაქო სექტორს, ბიზნესს და პარტიებს, შლის სისტემებს და იტაცებს საჯარო ინსტიტუტებს.
300 დღეა, რაც ავტორიტარიზმს ამყარებს და ქვეყანას რუსეთის გუბერნიად აქცევს, ქვეყნის ეკონომიკას რუსულ და ჩინურ ბაზარზე კიდებს და მოსახლეობას აღარიბებს. ამიტომ ამ და უამრავი სხვა მიზეზის გამო, 300 დღეა ვდგავართ ქუჩაში და ვიდგებით სანამ ქვეყანა არ დაუბრუნდება დემოკრატიულ განვითარების გზას, სანამ ყველა პოლიტპატიმარი არ განთავისუფლდება და არ ჩაინიშნება ახალი სამართლიანი საპარლამენტო არჩევნები“,- ნათქვამია აქტივისტებისა და სამოქალაქო ჯგუფების მიერ ერთობლივად გავრცელებულ განცხადებაში.
