უკრაინის პრეზიდენტმა, ვოლოდიმირ ზელენსკიმ უკრაინასა და დიდ ბრიტანეთს შორის 100-წლიანი პარტნიორობის ხელშეკრულების შესახებ კანონს ხელი მოაწერა. ინფორმაციას ამის შესახებ უკრაინული მედია ავრცელებს.
"ჩემთვის დიდი პატივი და პრივილეგიაა ხელი მოვაწერო კანონს, რომელიც გაერთიანებულ სამეფოსა და უკრაინას შორის 100-წლიანი პარტნიორობის ხელშეკრულების რატიფიცირებას ახდენს", - აცხადებს უკრაინის პრეზიდენტი.
როგორც უკრაინული მედია აღნიშნავს, ახალი შეთანხმება აფართოებს კიევსა და ლონდონს შორის თანამშრომლობას უსაფრთხოების სფეროში.
დოკუმენტი ითვალისწინებს ორმხრივი თანამშრომლობის ახალ გრძელვადიან ჩარჩოს, რომელიც მოიცავს უსაფრთხოების, თავდაცვის, ეკონომიკის, მეცნიერების, ტექნოლოგიებისა და კულტურული კავშირების სფეროებს.
შეგახსენებთ, უკრაინის უმაღლესმა რადამ ხელშეკრულების რატიფიცირებას გუშინ, 17 სექტემბერს დაუჭირა მხარი.
