აშშ-ის წარმომადგენელთა პალატის სპიკერმა მაიკ ჯონსონმა განაცხადა, რომ კონგრესი რუსეთის წინააღმდეგ ახალ სანქციებს პრეზიდენტ დონალდ ტრამპის თანხმობის გარეშე არ მიიღებს. ამავდროულად, მან აღნიშნა, რომ სანქციების საჭიროება დიდი ხნის წინ მომწიფდა. ამის შესახებ ჯონსონმა CBS News-თან ინტერვიუში ისაუბრა.
ჯონსონმა განაცხადა, რომ კონგრესში „დიდი ინტერესია“ რუსეთის წინააღმდეგ ახალი შეზღუდვების შემოღების მიმართ. სპიკერმა აღნიშნა, რომ მზადაა ითანამშრომლოს თეთრ სახლთან და სენატთან, რათა უზრუნველყოს სანქციების მიღება.
„მე ნამდვილად მჯერა, რომ სასოწარკვეთილი დრო სასოწარკვეთილი ზომების მიღებას მოითხოვს. ვფიქრობ, რუსეთის წინააღმდეგ სანქციები დიდი ხანია საჭიროა და კონგრესში ამ საკითხის მიმართ დიდი ინტერესია. ასე რომ, ჩვენ მზად ვართ ვითანამშრომლოთ თეთრ სახლთან და ჩვენს კოლეგებთან სენატსა და წარმომადგენელთა პალატაში, რათა ეს განხორციელდეს. პირადად მე ძალიან მსურს ამის გაკეთება,“ - განაცხადა ჯონსონმა.
ამავდროულად, მან ხაზგასმით აღნიშნა, რომ კონგრესს არ შეუძლია ასეთი გადაწყვეტილებების დამოუკიდებლად მიღება, რადგან პრეზიდენტის როლი გადამწყვეტია.
„პრეზიდენტს მოუწევს ყველა ჩვენი ქმედების ხელმოწერა და კანონის სახით დამტკიცება. ეს უნდა იყოს პარტნიორობა, მაგრამ ჩვენ ანგარიშვალდებული ვართ მთავარსარდლის წინაშე“, - აღნიშნა მან.
