ცენტრალური საარჩევნო კომისიისა და ცესკო-ს სწავლების ცენტრის ინიციატივით, რეგიონული მედიის წარმომადგენლებთან სამუშაო შეხვედრა გაიმართა.
ცესკო-ს ცნობით, შეხვედრაზე განხილვის მთავარი თემები იყო კენჭისყრის პროცესში საარჩევნო ტექნოლოგიების დანერგვა და გამოყენების პროცესის მიმოხილვა, მიმდინარე წლის თვითმმართველობის არჩევნები, არჩევნებში მედიის როლი და საერთაშორისო სტანდარტები არჩევნების ორგანიზების პროცესში.
ღონისძიება ცესკო-ს თავმჯდომარემ, გიორგი კალანდარიშვილმა გახსნა თავმჯდომარის მოადგილესთან, გიორგი შარაბიძესთან, კომისიის მდივანთან, გიორგი ჯავახიშვილსა და საარჩევნო სისტემების განვითარების, რეფორმებისა და სწავლების ცენტრის ხელმძღვანელთან, ნათია ზაალიშვილთან ერთად.
როგორც ცესკო-ს ინფორმაციაშია აღნიშნული, შეხვედრაზე ყურადღება გამახვილდა ჟურნალისტების არსებით როლზე საარჩევნო პროცესებში, ასევე აუცილებლობაზე, საზოგადოებამ მუდმივად მიიღოს სწორი და ზუსტი ინფორმაცია არჩევნების შესახებ, გამორჩეულად კი – საარჩევნო პერიოდში.
ღონისძიებას ესწრებოდა ზოგიერთი საოლქო საარჩევნო კომისიის ხელმძღვანელი პირიც. მათ აქტიური მონაწილეობა მიიღეს დისკუსიაში და იმ პროცესების შესახებ ისაუბრეს, რომლებიც არჩევნებისთვის მზადების პროცესში და უშუალოდ კენჭისყრის დღისთვის საოლქო საარჩევნო კომისიებში ხორციელდება.
„ამომრჩეველთა ინფორმირება საარჩევნო ადმინისტრაციისთვის ერთ-ერთ პრიორიტეტულ მიმართულებას წარმოადგენს, რაშიც, რა თქმა უნდა, მედიას განსაკუთრებული როლი აქვს. შესაბამისად, იმისთვის, საარჩევნო პროცესები აქტიურად გაშუქდეს, მნიშვნელოვანია, მედიას მუდმივად მივაწოდოთ ზუსტი, გადამოწმებული და ობიექტური ინფორმაცია. ამ მიზნით ჩვენ, უკვე რამდენიმე წელია, მედიასაშუალებებს ვთავაზობთ განსაკუთრებულ პლატფორმას, რომლის ფარგლებშიც ინსტიტუციის ხელმძღვანელი პირებისგან მათ აქვთ შესაძლებლობა, უშუალო სამუშაო გარემოში მოისმინონ დეტალები ყველა იმ საარჩევნო საკითხთან დაკავშირებით, რომლებიც დღეს როგორც საზოგადოებაში, ასევე მედიაში განსაკუთრებულ ადგილს იძენს“, – განაცხადა ცესკო-ს თავმჯდომარემ კონფერენციის დასრულებისას.
როგორც ცესკო-ს სწავლების ცენტრის დირექტორმა, ნათია ზაალიშვილმა აღნიშნა, იმისათვის, რომ მედიამ სწორად მოახდინოს საკუთარი უფლებების რეალიზება, იყოს ინფორმირებული ელექტორატი, მნიშვნელოვანია მუდმივად ზრუნვა საარჩევნო კულტურისა და ცნობიერების ამაღლებაზე.
„ამ თვალსაზრისით კი, ჩვენი მხრიდან ადმინისტრირებას ხელს უწყობს, როცა ყველა ჩართული მხარე – ამომრჩეველი, პოლიტიკური პარტია, მედია თუ დამკვირვებელი არის ინფორმირებული. ამიტომ სწავლების ცენტრი საარჩევნო ადმინისტრაციასთან მჭიდრო თანამშრომლობით ახორციელებს შეხვედრებსა და საინფორმაციო სასწავლო პროგრამებს, რაც სწორედ ცნობიერების ამაღლებას უწყობს ხელს“, – აღნიშნა სწავლების ცენტრის დირექტორმა, ნათია ზაალიშვილმა.
როგორც შეხვედრის დასასრულს გიორგი კალანდარიშვილმა განაცხადა, ამ ტიპის შეხვედრები მომავალშიც აქტიურად გაგრძელდება, რითიც საარჩევნო ადმინისტრაცია უზრუნველყოფს მჭიდრო, საქმიან ურთიერთობებს მედიასთან ქვეყნის მასშტაბით და საზოგადოების მუდმივ ინფორმირებას საარჩევნო პროცესებთან მიმართებით.
