აშშ-ის სახელმწიფო დეპარტამენტმა უკრაინისთვის Patriot-ის ჰაერსაწინააღმდეგო სისტემის, შესაბამისი აღჭურვილობისა დაStarlink -ის სატელიტური კავშირის მომსახურების, მიყიდვა დაამტკიცა. საერთო ჯამში ამ ტექნიკისა და სერვისის ღირებულება 329 მილიონი დოლარია. ამის შესახებ აშშ-ის თავდაცვის დეპარტამენტის სამხედრო თანამშრომლობის სამმართველო იუწყება.
უწყების ცნობით, უკრაინის მთავრობა გეგმავს Patriot -ის სისტემის ტექნიკისა და მომსახურების შეძენას დაახლოებით 179,1 მილიონი დოლარის ოდენობით.
პაკეტი მოიცავს საიდუმლო და არაგასაიდუმლოებულ სათადარიგო ნაწილებს, ტექნიკურ მხარდაჭერას, პროგრამულ უზრუნველყოფასა და მის განახლებებს, სისტემის მოდიფიკაციას, საცდელ მოწყობილობებს, საკომუნიკაციო ტექნიკას, ინტეგრაციის მომსახურებას, რემონტს, ტექნიკურ დახმარებას და შესაბამის მატერიალურ-ტექნიკურ ბაზას.
სახელმწიფო დეპარტამენტმა ასევე დაამტკიცა Starlink-ის სატელიტური კომუნიკაციების სერვისებისა და მათთან დაკავშირებული აღჭურვილობის მიყიდვა საერთო ჯამში 150 მილიონი დოლარის ოდენობით. გარიგების ამ ნაწილში მთავარი კონტრაქტორი Starlink Services იქნება.
