სამხედრო რომ ხარ, პოლკოვნიკის ჩინს რომ მოგანიჭებენ და მაგრად გიხარია, დაახლოებით ასეთი განცდა მაქვს, - ასე ეხმიანება კოალიცია „ძლიერი საქართველოს“ ლიდერი, ალეკო ელსიაშვილი ინფორმაციას, რომლის თანახმად, რუსეთის გენერალურმა პროკურატურამ მის წინააღმდეგ საერთაშორისო ძებნა გამოაცხადა.
"სამხედრო რომ ხარ, პოლკოვნიკის ჩინს რომ მოგანიჭებენ და მაგრად გიხარია, დაახლოებით ასეთი განცდა მაქვს. ძალიან დიდი პატივია, რომ უკრაინელი ხალხის ჩემს მიერ მხარდაჭერის გამო, რუსებმა ასეთი გადაწყვეტილება მიიღეს. მე უკრაინაში პირველ რიგში იმან წამიყვანა, რომ საქართველოს და უკრაინის საერთო მტერთან მებრძოლა და საქართველოს ინტერესები დამეცვა. ძალიან ვიამაყებ მთელი ცხოვრება, რომ ძალიან მაგარ ბიჭებთან, როგორც უკრაინელ ასევე უცხოელებ მეომრებთან და პირველ რიგში ქართველ ბიჭებთან ერთად ვიყავი. მაინც ოროსნები არიან რუსები და ბევრი შეცდომები უწერიათ, მე ქართულში არა, უცხოურ ლეგიონში ვმსახურობდი, და მეორე, უწერიათ, რომ ფული აიღო და დაქირავებული მებრძოლი იყოო, მე მოხალისე ვიყავი და ერთი თეთრი არ ამიღია, ერთი იმათი ფული არ ამიღია, თავიდან ბოლომდე მოხალისე ვიყავი. ჩემი ფულით წავედი და წამოვედი, თვენახევარი ვიყავი იქ და ერთი სწორი რაც არის, ირპენის გათავისუფლების ოპერაციაში ვმონაწილეობდი, რითაც ვამაყობ. რუსებმა კარგ ხასიათზე მომიყვანეს, -განაცხადა ელისაშვილმა.
მისი თქმით, “ოცნება“ და რუსები ძალიან გადაბმულები არიან და დღეიდან ძალიან ფრთხილად იქნება.
"დღეიდან ძალიან ფრთხილად ვიქნები, ვიდრე აქამდე ვიყავი, რადგან “ოცნება“ და რუსები ძალიან გადაბმულები არიან და კუდით გადაჯაჭვულები, თუმცა, რამე განსაკუთრებულ საშიშს ამაში ვერაფერს ვხედავ, პირიქით. რუსებს ჩემი დაჭერა უნდათ და დაუსწრებლად ძებნა გამოაცხადეს ჩემზე და აგერ “ქართული ოცნება“ რუსების ხელით, იგივეს ასრულებას აპირებს, მაგრამ უნდა დავამარცხოთ ესენი,- განაცხადა მან.
მისივე დაკავების არ ეშინია და არ დარდობს იმაზე, დაიჭერენ თუ არა.
"დამიჭერენ, დამჭირონ, ამათმა შეაშინონ ერთმანეთი, რუსებმა ესენი და ამათმა უქიცინონ კუდი. პატარა ბავშვები და ქალები სხედან, გაუტეხელი და მედგარი. არ გვეშინია, უნდა მივაწვეთ", - განაცხადა ელისაშვულმა "ტვ პირველის" ეთერში.
შეგახსენებთ, დღეს ცნობილი გახდა, რომ რუსეთის გენერალურმა პროკურატურამ საერთაშორისო ძებნა გამოაცხადა ალექსანდრე ელისაშვილზე.
